CEBU, Philippines - Si Rhenzi Kyle Sevillano mirehistro og 8.5 puntos aron maghari ug ingon man mabulsa ang lima ka libo nga ganting salapi sa Rapid Summer King Open Chess Tournament sa miaging weekend didto sa Deep Blue 'D Woodpusher sa SM City-Cebu.
Samtang nibatog si Sevillano sa kinatumyang dapit, sila si Ronald Ganzon, NM Merben Roque ug Christian Yves Fiel nagtabla sa managsamang 7.5 puntos aron mopuwesto sa ikaduha hangtod sa ikaupat nga dapit. Nakadawat sila'g P2 mil matag usa. Si Edcel Montoya maoy ikalima sa iyang 7.0 puntos, sila si NM Roselio Enriquez Jr., Joel Pacuribot, Arnolito Cadiz, Allan Salientes, Carlos Moreno III ug Felix Shaun Balbuena naapil sa top 11 finishers nga parehong mikutlo'g 6.5 puntos.
Mokompleto sa top 20 mao sila si Anthony Makinano, Eden Diano, Richard Natividad, Vincent Balena, Michael Joseph Pagaran, Rommel Ganzon, Justine Flint Misa, Concordio Plando ug Edwin Cablao. Sila si Adrian Basil Basilgo ug Jelou Tabanao nakadawat og P1,000 matag usa sa ilang pagdominar sa kiddie ug female player sa torneyo nga gipaluyohan ni Engr. Blas Hipulan, Carlos Tan, Molet Hortelano, Atty. Mariano Tan, Engr. Ehte Dominguito ug Bodjie Lim sa Rose Pharmacy.