CEBU, Philippines - Usa ka bangis nga 29-14 scoring run sa second half ang gigamit sa Prime Asia Lending-University of the Visayas (UV) aron ilubong ang Gaisano Capital South-University of Cebu, 80-57, sa pagbukas sa Enervon CESAFI Partner's Cup 2013 kagahapon didto sa Cebu Coliseum.
Sayung nakontrolar sa Prime Asia-UV ang labaw ug wala na nila gamita sa final period ang 6-foot-7 import nga si Steve Cedric Akomo. Misuway paggukod ang Gaisano-UC sa final period apan igo lang sila nga nakasikit og 22 puntos, 56-78.
Nangulo sa Prime Asia-UV mao si Angelo Babia Jr. sa iyang 13 puntos, samtang si Alfred Codilla ug Francisco Arong miiskor og 10 puntos matag usa ug si Akomo midunol og otso puntos.
Ang Prime Asia musuway pagsakmit og 2-0 nga baraha ugmang adlawa sa ilang pakigsangka sa Lions Katol-University of Southern Philippines Foundation.
Sa ilang bahin, midala sa opensa sa pilderong Gaisano-UC mao si Gerald Ampoon nga adunay 11 puntos, Kyle Misa nga mipugnit og nuybe puntos ug Alexander Asia nga adunay syete puntos.
Ang Gaisano-UC musuway pagbangun ugma sa ilang pakigsangka sa Cebu Landmasters-University of San Carlos (USC).