CEBU, Philippines - Hayag na ang damgo ni ALA Boxing Gym superstar Milan 'El Metodico' Melindo nga mahimong usa ka Filipino world champion human mahingpit ang iyang title fight batok ni Mexican Juan Francisco 'El Gallo' Estrada sa Agosto.
Si Melindo gisaaran ni Top Rank Inc. CEO Bob Arum nga himuong challenger ni Estrada, kinsa midaog pinaagi sa split decision aron ilogon ang WBO/WBA flyweight titles gikan ni Brian Viloria niadtong Sabado sa gabii didto sa Venetian Hotel and Casino sa Macau.
"Oras na nako, ako na pud, dugay ko nga naghuwat karon segurado na gyud ko nga moaway sa world title," matud pa ni Melindo sa iyang pagbisita kagahapon sa buhatan sa The Freeman ug Banat News uban si ALA Boxing Vice President Dennis Cañete.
Si Melindo, 24-anyos, miaway sa maong boxing card diin midaog kini pinaagi sa fourth round TKO batok ni Indonesian fighter Tommy Seran.
"Wa ko nag-expect nga ingon ato nako siya (Seran) kasayon mapilde, lig-on pud ako kontra ug nagpasalamat ko nga na-knockout nako," dugang pa ni Melindo.
Nagtuo si Melindo nga sa umaabot niyang sangka batok ni Estrada modaog siya ug makuha niya ang world flyweight titles.
"Dili man kusog og kumo si Estrada kay wala gud siya katumba ni Viloria, kaya kaayo nako siya ug daku ko'g chance nga mapatumba siya," segun pa sa garbo sa Cagayan de Oro City na si Melindo.
Si Melindo gitakdang mobalik pag-ensayo sunod buwan aron mapangandaman og maayo ang iyang laraw pagsakmit sa world title
Wala pay binyu kun asa ipahigayon ang away, apan si Melindo andam moaway bisa'g asa aron makita ang katag sa away nilang Estrada.
Si Melindo miinat sa iyang rekord ngadto sa 29-0 uban ang 12 ka knockouts, samtang ang 22-anyos nga si Estrada adunay 23-2-18KOs. (BANAT PALARO)