CEBU, Philippines - Napakyas si Filipino-American boxer Brian Viloria pagdepensa sa iyang WBO ug WBA flyweight title human siya gilupig pinaagi sa split decision sa Mehikano nga si Juan Francisco Estrada niadtong Sabado sa gabii didto sa Venetial Resort and Casino sa Macau.
Gipakita sa mas batan-on nga si Estrada nga labaw siya sa kapaspas dihang iyang gipauwanan og mga kombinasyon si Viloria kinsa naglisud pagpakgang sa agresibo nga atake sa Mehikano.
Ang 32-anyos nga si Viloria misuway pakig-bell-to-bell ni Estrada sa hinapos nga rounds sa away, apan nagpabiling isug si Estrada ug wala kini miatras sa pakigbinukbukay ni Viloria hangtud sa katapusang bagting sa kampanilya.
Human sa 12 rounds tulo ka mga hurado ang miiskor og 116-111 ug 117-111 ngadto ni Estrada samtang usa ka judge ang mihatag og 115-113 ngadto ni Viloria.
Hinuon bisan pa sa maong kapildehan, aduna gihapoy nindot nga balita alang sa mga Filipino boxing fans tungod kay gisangyaw ni Top Rank Inc. CEO Bob Arum nga sunod nga mahimong challenger ni Estrada mao ang ALA Gym superstar nga si Milan Melindo.
“I don’t think Estrada really hits hard,†matud pa ni Melindo sa Philboxing. “I heard Melindo wants to fight me. We will fight any day of the week,†tubag usab sa Mehikano.
Si Melindo midaog sa susamang fight card human niya gikulata sa fourth round ang Indonesian contender nga si Tommy Seran.
Wala pa masugdi ang detalye alang sa maong sangka, apan giplanohan ni Arum nga ipahigayun kini sa Agusto didto gihapon sa Macau.