CEBU, Philippines - Gipakuratan sa team Delta ni team owner Roland 'El Presidente'
Sameon ang team Bravo pinaagi sa pagdaog, 88-82 aron moabante sa semifinals sa Center Katipunan A. Lopez Christian
Organization (CEKALCO) 2013 basketball tournament niadtong Biyernes didto sa A. Lopez open court sa barangay
Labangon.
Ang undermanned nga Delta sayo kaayong nakakontrolar sa duwa pinaagi sa ilang 32-12 run luyo sa
paningkamot nilang Juniel Villarosa ug pointguard Julius Gutierez. Apan mibawos ang Bravo sa second quarter pinaagi sa
ilang 39-10 run uban ang hugot nilang depensa sa tandem nilang Bryan Codilla ug Dondon Tenchavez.
Miabag sab sa opensa silang Francis Philip Nacar ug Tata Maspiñas aron papason ang ilang 20 puntos nga
biya ug nakahimo pag-ilog sa labaw, sa halftime sa iskor nga 51-42.
Padayong nanginit ang Bravo sa third period diin mihimo sila'g 20-18 run aron moposte og 71-60 nga bentaha
pagsugod sa fourth quarter.
Nausab ang dagan sa duwa sa final period dihang nagmangtas silang Villarosa ug Gutierez aron pangulohan
ang ataki sa Delta. Ilang na-outscore ang Bravo, 28-11 aron hingpit makaipsot.
Silang Villarosa ug Gutierrez parehong miiskor og 27 puntos alang sa Delta, samtang si Arthur Acosta miamot
og 12 puntos.
Ang Bravo gipangulohan nilang Maspiñas ug Nacar sa ilang 23 ug 21 puntos matag usa, samtang silang
Tenchavez ug Codilla nagkumboya og 23 puntos. (BANAT NEWS)
PUNTOS MATAG USA
DELTA (88) - Villarosa 27, Gutierez 27, Acosta 12, Estrada 8, Gonzaga 6, Sinag 5, Dumduma 3
BRAVO (82) - Maspiñas 23, Nacar 21, Tenchavez 12, Codilla 11, Perino 5, Arnibal 4, Loayon 2, Gacho 2,
Arnaiz 2