CEBU, Philippines - Magpas-an og dakung bagahi ang Team Philippines nga gipaluyohan sa Cebuana Lhuillier sa ilang pakigsangka
sa Thailand sa second round sa Davis Cup Asia/Oceania Group II tie sugod karong adlawa didto sa Plantation Bay
Resort and Spa sa dakbayan sa Lapu-Lapu.
Ang host Philippines nakapahimus usa ka lusok nga bentaha, 3-2 batok sa Thailand sa miaging lima nila ka
duwa.
Giharos sa Philippines ang unang tulo ka mga duwa, apan ang Thailand mibawos sa sunod nilang duha ka
engkuwentro, ang katapusan niadtong 1999.
Gawas sa pagdepensa sa ilang balwarte, ang Pinoy netters kinahanglan nga modaog sa ilang tahas batok sa
Thailand aron daku ang ilang kahigayonan nga mabalik sa Group I.
Ang maong tahas ilang itugyan ngadto nilang Ruben Gonzales ug Johnny Arcilla nga maoy unang moaway alang
sa nasud batok sa bisitang Thai netters karong hapon.
Si Gonzales makigsangka ni 6-foot-4 Davis Cup greenhorn Trongcharoenchaikul Wishaya sa unang singles
match sa alas-3:30 sa hapon, samtang si Arcilla, kinsa adunay dugong Sugbuanon, makigbatok ni Danai Udomchoke sa
ikaduhang singles sa alas-6 sa gabii.
Ang doubles event himuon ugma diin sila si Treat Huey ug Francis Casey Alcantara makigduwa batok nilang
Nuttanon Kadchapanan ug Pruchya Isarow, samtang ang reverse singles himuon inig Domingo.
Ang modaog sa Philippines-Thailand match moabante ngadto sa third ug final round sa Group II batok sa New
Zealand o di ba sa Pakistan sa Septiyembre. Ang modaog sa third round mosaka sa Group I, samtang ang mapilde
magpabilin sa Group II. (BANAT NEWS)