Wala ako mokuber sa torneyo sa ThreeSixty Pharmacy Cup 2013: CYBL Season 6 basketball tournament ug wala gyud ako makakita bisan usa na lang ka duwa niini bisan ang labing uwahi nga Under 19 finals didto sa City Sports Club sa Ayala niadtong Marso 26.
Wala sab ako'y nakit-an bisan asa nga duwa gikan sa laing age group divisions--sa Under 10, Under 12, Under 14 ug sa Under 16 age division apan kanunay akong updated sa resulta tungod kay dili man mosipyat pag-email kanako ang CYBL commissioner nga atong higala sa media nga si Rico Navarro kinsa mao sab ang athletic director sa Sacred Heart School-Ateneo de Cebu (SHS-AdC) Magis Eagles.
Ang Magis Eagles kinsa maoy nagdala sa uniporme sa Central Visayas Regional Athletic Association (CVIRAA) High School team maoy misakmit sa korona sa Under 19 division ug sumala sa akong nabasahan sa email ni Rico, daw sa ako lang gihapon maoy nagkober sa maong duwa kay susama ra man gihapon kini sa panghitabo sa Cebu Schools Athletic Foundation, Inc. (CESAFI) finals ug sa Seaoil National Basketball Training Center (NBTC) Elite League finals diin ang mitumaw nga pangalan nga nagdala'g bida sa duwa mao si Arc Gabriel “Argee†Araw-araw dihang ila na sab gipukan ang University of the Visayas (UV) sa finals sa iskor, 85-79.
Kanunay untang naglabaw ang CVIRAA apan mihimo'g rally ang UV aron mosikit ug didto sa uwahing bahin sa fourth period, igo na lang naglabaw ug usa ka lugas ang CVIRAA, 77-76 human sa three-point play ni Jan Soliva sa UV may 2:04 ang nahibiling oras sa duwa.
Didto niadtong tungora nga gisalbar ni Araw-araw ang CVIRAA. Nagsugod kini sa iyang krusyal nga three-pointer, 80-76 may 1:50 ang oras.
Gitubag ni Ralph Dinolan sa UV aron mahimo kining 78-80 ug nakuhaan gamay ang oras sa 1:34 ug pinaagi sa maayong screen ni Dawn Ochea, mi-iskor si Araw-araw ug pinasulbong nga lay-up alang sa 82-78 nga bentaha ug nag-anam na kagamay ang oras nga may 32.4 segundos.
Nakahimo'g split charities si Jerome Napao sa UV aron himoon ang iskor nga 79-82 ug 17.3 segundos na lang ang nahibiling oras ug gibaslan sab kini dayon ni Araw-araw ug duha ka free throws dihang gituyo siya'g foul sa UV aron mahunong ang oras ug gihatagan ang CVIRAA og 84-79 nga abante may 10.2 segundos ang oras.
Sa laktud nga pagkasulti, halos tanang puntos sa CVIRAA sa daginotong oras gikan ni Araw-araw ug dili kini bag-o alang kaniya tungod kay mao kini iyang gihimo sa CESAFI ug NBTC finals.
Si Araw-araw maoy nangu sa CVIRAA sa iyang 21 puntos ug midugang si Rendell Senining og 19 puntos.
Usa ka maayong back-up guard kini si Senining ug hugot kaayong modepensa. Lima tanan ka players sa CVIRAA niadtong higayona ang mibahug og double figures nga naglakip sab kanilang Ochea kinsa mihakot og 14 puntos, miamot ug 12 puntos si Lucky Ecarma ug may 10 puntos si Fletcher Galvez .
Si Dinolan maoy nangu sa UV sa iyang 25 puntos ug may 19 puntos si Napao ug laing 15 puntos gikan kang Ernesto Limitares.
Matod pa ni Rico nga mao kadto'y unang korona sa SHS-Ateneo de Cebu sa mas taas nga age division sa CYBL.
LAMAR BOO-DOM. Pwerte nakong luoya magtan-aw ug magpaminaw sa NBA coverage dihang matag dawat ni Lamar Odom sa bola, makabungog intawon nga "boo" ang iyang madawat gikan sa mga fans sa Dallas Mavericks niadtong Marso 26 dihang napilde ang Los Angeles Clippers batok sa Mavs sa overtime ug gani mas kusog pa ang iyang madawat nga boo kay sa adunay taga Dallas nga maka-iskor.
Dili nato mabasol ang taga Dallas sa ilang kalagot ngadto ni Odom kinsa didto miduwa makadiyot sa Dallas akan kalit lang mitapon ngadto sa Clippers.
Alang kanila ang pag-boo ni boo-Dom maoy silbing pagpahungaw sa ilang kalagot ug dugang pang mga boo ang madawat niadtong mga players kinsang pagbalhin wala mauyoni sa mga fans.