CEBU, Philippines - Gipakuratan sa University of San Jose-Recoletos (USJ-R) Baby Jaguars ang bantugang University of the Visayas (UV) Baby Lancers, 46-44 sa Under 19 division sa ThreeSixty Pharmacy Cup 2013 CYBL Season 6 niadtong Sabado didto sa Sacred Heart School-Ateneo de Cebu Mango Avenue Campus gym.
Apan ang ilang kadaugan gitugbangan og kapildihan human sila masukamod ngadto sa University of Southern Philippines Foundation (USPF) sa iskor nga 58-62.
Sa laing bahin, ang CVIRAA High School, ACES ug ang UV sa Under 16 division pulos mikulit og impresibo kaayong kadaugan.
Ang CVIRAA midaog batok sa Adgers, 48-38, ang ACES mihipos og duha ka daog, una batok sa Sacred Heart School- Ateneo de Cebu team 2 sa iskor nga 58-28 ug nasundan kini human ilang gilubong ang Lucky 40, 56-34.
Ang UV Under 16 team milubong sab sa Lucky 40 sa iskor, 95-20 ug ingon man batok sa SHS-Ateneo team 2, 66-27.
Naglabaw ang USJ-R batok sa UV, 14-3 sulod sa first period ug miburot pa kini ngadto sa 13 puntos, 27-14 sa halftime.
Misamot kini kainat sa third period, 40-26, apan kalit lang nagmangtas ang UV ug mihimo'g mainitong rally pero nakabsan sila sa oras hinungdan sa ilang kapildihan.
Ang free throw ni Angelo Robillo maoy naghatag og 46-42 nga labaw sa USJ-R sa wala pa mobawos si Ralph Dinolan sa UV alang sa final score.