CEBU, Philippines - Nakalingkawas si WBO welterweight champion Tim Bradley sa kabangis ni Russian Ruslan Provodnikov human niya mapanalipdi ang iyang bakus pinaagi sa unanimous decision kagahapon didto sa Home Depot Center sa California.
Ang undefeated American kinsa miilog sa bakus ni Manny Pacquiao niadtong Hunyo sa miaging tuig naglabaw sa puntos, apan diriyot siya madisgrasya sa katapusang round human siya mapatumba ni Provodnikov.
Hinuon nakarekober si Bradley ug natiwas niya ang 12 round diin naangkon niya ang desisyon nga kadaugan. Tulo ka mga hurado ang mihatag og 114-113, 114-113 ug 115-112 pabor ngadto sa Amerikanong boksidor.
Si Bradley pabiling walay pilde sud sa 30 niya ka away, apan mipakita usab sa iyang kaisug ang kanhi sparmate ni Pacquiao nga si Provodnikov kinsa nakahiagum sa iyang ikaduhang pilde sud sa 24 ka away.
Human sa maong kadaugan, gipikhan ni Bradley si Pacquiao dihang iyang gihulagway si Provodnikov nga mas kusug pa og kumo sa Filipino boxing superstar.
“He’s (Provodnikov) much more powerful than Manny Pacquiao. He hits harder, and has shorter punches. He’s a great puncher, and I take my hat off to him," matud pa ni Bradley. (LPM gikan sa boxingscene.com)