CEBU, Philippines - Magsinukliay na sa ilang mga kumo sila si Filipino flyweight contender Gerpaul 'TI Yamagata' Valero (13-14, 9KOs) ug Jonathan Ricablanca (6-39, 1KO) sa main event sa "Champions of the Future" fight card karong gabii didto sa Panphil B. Frasco Memorial Sports Complex sa Liloan, Cebu.
Tinguha ni Valero nga modaog aron matabonan ang iyang kapildihan ngadto ni ALA boxer Jerson Mancio niadtong Enero 20 didto sa Gaisano Countrymall carpark.
Sa iyang bahin, ang taga-Surigao del Sur nga si Ricablanca laraw sab nga mopukan ni Valero. Si Ricablanca maoy gipuli ni Jovylito Aligarbes, ang orihinal nga kontra ni Valero. Si Aligarbes dili mopakita'g aksiyon kay maglisud pagkuha sa timbang.
Sa supporting bout, si Rajah Renoel Pael sa Siquijor makigsangka ni Ryan Bongcawil sa Bukidnon, samtang si Redondo Singwangcha moaway batok ni Elmer Colve sa Zamboanga.
Sa undercards magsangka sila si Boyose Singwangcha ug Jeffrey Jimenez, Llanera Singwangcha batok Rodel Wenceslao, Tabanao Singwangcha batok Jun Ryan Quimbo, Kenny Singwangcha batok Bryan Samson, Canoy Singwangcha batok Keith Batolenyo, Belmar Plaza batok Junel Lacar ug Francisco Singwangcha batok Nike June Quinaadman.
Ang maong boxing event gipasiugdahan ni Thai boxing patron Naris Singwangcha ug RWS International Promotions ni Cebuano promoter Rex 'Wakee' Salud uban sa suporta sa kagamhanan sa lungsod sa Liloan. (BANAT PALARO)