CEBU, Philippines - Migawas nga hari ug reyna sila si James Mibei ug Mary Joy Tabal sa 1st MASEMCO - Run for the Heart
niadtong Domingo didto sa Parkmall grounds sa Mandaue City.
Ang Kenyan nga si Mibei maoy milingkod sa trono dihang naghari kini sa 10K men's open human niya
gitapos ang lumba sud lang sa 26 minutos ug 19 segundos. Sila si Isaac Simat (0:26.24) ug Philip Ronoh (0:27,24) maoy
mi-okupar sa mosunod nga duha ka dapit.
Sa iyang bahin, ang Sugbuanang si Tabal nga mi-oras og 0:31.20 mipilde nilang Irini Kip Chumba (0:34.34)
ug Christy Sevilleno-Tutor (0:37.01) aron sakmiton ang 10K women's crown.
Sila si Mibei ug Tabal nakadawat og P5,000 ug medalya matag usa ning lumba nga gidumala sa Mandaue
Runners Clubs (MRC) sa liderato ni Democrito 'Emok' Branzuela uban sa MASEMCO ubos sa ilang manager Jaque
Galapin.
Sa laing bahin, sila si Francis Kakui, Prince Joey Lee ug John Darryl Manos maoy top three finishers sa 5K
men's division, samtang ang managsuong Andrin nga silang Lovely Fe ug Jhean ug si Aiza Suaybaguio mao sab ang top
three sa 5K women's class.
Sa 3K kiddies mixed, ang top three finishers mao sila si Kevin Torremocha, Jovenel Oyao ug John Joshua
Ernane.
Nahimong posible ang lumba tungod usab sa pagpaluyo sa Parkmall, Gleam Signage, Runnr, Nature's Spring
Water ug sa HDP Printing. (BANAT NEWS)