CEBU, Philippines - Milampos si Ben Allen sa Australia pagdepensa sa iyang titulo sa men’s pro division sa Vaseline Men XTerra Philippines
Off-Road Triathlon Championships kagahapon didto sa Seafront Resort sa Liloan, Cebu.
Si Allen milansang og back-to-back championship human niya gitapos ang lumba sud sa duha ka oras 37
minutos ug 40 segundos.
Ang pambato sa South Africa nga si Daniel Hugo mi-okupar sa ikaduhang dapit sa swim-bike-run event sa
oras nga 2:38:31, samtang si Sam Gardner sa United Kingdom mikapyot sa ikatulo sa oras nga 2:48:46.
Sa women’s class, gihuboan sa korona ni Lesley Paterson sa America ang defending champion nga si Renata
Bucher sa Switzerland. Si Paterson mioras og 2:45:41, samtang si Bucher adunay 3:00:03. Si Darrelle 'Daz' Parker sa UK
mipuwesto sa ikatulong dapit sa oras nga 3:55:21.
Gipilde sab ni Alexandra Ganson ang Sugbuanang si Rochelle Tan alang sa Filipino elite women’s title.
Si Ganzon mihuman sa lumba sa oras nga 4:15:03, si Tan sa oras nga 4:24:53, samtang si Joyette Jopson
mitapos sa oras nga 4:45:58 alang sa ikatulong dapit.
Sa Filipino elite men’s category, ang taga-Zamboanga nga si Joseph Miller maoy mihari human niya gitapos ang
lumba sa oras nga 3:05:51. Si Benjamin Rana (3:10:13) ug Jefferson Tabacon (3:11:20) maoy miangkon sa mosunod nga
duha ka puwesto.
Ang Sugbuanong aktor nga si Matteo Guidicelli maoy naghari sa 20-24 class.
Karong adlawa himuon ang trail run sa Xterra Philippines nga salmotan sa ubang mga elite international
triathletes. (BANAT NEWS)