CEBU, Philippines - Langyaw'ng boksidor nga si kanhi two-time Indonesian world title challenger Angky 'Time Bomb' Angkota (26-8, 14KOs) mibahad nga iyang hatagan og lisud nga away si ALA rising star Genesis 'Azukal' Servania (19-0, 6KOs) sa supporting main event sa "Pinoy Pride XVIII: World Champion vs. World Champion" karong Sabado sa gabii didto sa Waterfront Cebu City Hotel and Casino.
Sa edad nga 31-anyos, si Angkota nagtuo nga aduna pa siya'y kusog nga ikabuga batok sa mas batan-on nga si Servania, ang reigning WBO Asia-Pacific ug WBC Silver super bantamweight title-holder.
"I have fought so many strong fighters like Jorge Arce, Fernando Montiel and AJ Banal. I have only three years left in my boxing career and I will do my best to beat Servania," matud pa ni Angkota atol sa press conference kagahapon didto sa Formo Resto Bar sa Banilad Town Centre.
Nabantog si Angkota human niya pahamtangi si Nietes sa labing una niining pilde pinaagi sa "split decision" niadtong 2004 didto sa Indonesia.
Sa laing bahin, mag-atubang usab og lisud nga sangka si former OPBF champion Jimrex 'The Executioner' Jaca (30-6, 20KOs) human siya bahari nga tumbahon ni Rachamongkol Sor Pleonchit (13-4, 5KOs) sa Thailand.
Ang Thai fighter nakakita na sa mga away ni Jaca ug iya kining tumbahon kun makahigayon.
Ang mga Filipino boxers ug ilang mga langyaw'ng kaatbang magkita sa unang higayon karong adlawa sa final press conference didto sa Waterfront. Ugma himuon ang official weigh-in didto sa SM City-Cebu Activity Center. (BANAT NEWS)