Samtang naniudto kami didto sa restaurant sa ground floor sa Hotel Don Felipe sa dakbayan sa Ormoc niadtong Sabado, Pebrero 16 pipila lang ka minutos gikan sa among pag-abot sa Ormoc, nagkalingaw kami'g estorya-estorya ni Talisay City Engineer Ariel A. Araw-araw ug sa iyang mahigalaong kapikas nga si Dra. Grace Araw-araw, ang lady dentist sa Talisay City.
Aron dili mausik ang oras, akong gidresto'g pangutana si Engr. Araw-araw kung unsa may sekreto sa Sacred Heart School-Ateneo de Cebu (SHS-AdC) Magis Eagles nganong lisod na man kaayo silang pildehon karong mga panahona lahi kaniadto nga tag-anon nang daan nga pilde ang Sacred Heart ug huwaton na lang ang final score.
Karon nabalit-ad na ang kalibotan sa basketball dinhe sa Sugbo tungod kay ang klarong pildehonon kaniadto, mao nay nagpunay og tuhak, dagit ug pamiktima sa ilang mga kontra.
Kung imong panid-an ang matang sa ilang duwa, makaingon ka nga dunay sekreto pero ang usa gyud niini nga imo dayong mamatikdan mao ang grabeng teamwork ug walay luya-luya sa depensa.
Tungod sa ilang nakolektang mga tropeyo, maoy puntariya karon sa mga high school teams dinhe sa Sugbo ang Magis Eagles nga maoy pildehon apan pag-ingnon pa "easier said than done" ang ambisyonon sa pagpatugpa sa agila.
Kung aduna gani salmotan nga dakung torneyo ang Magis Eagles gawas sa probinsiya sa Sugbo, mag-meeting dayon ang mga parents ug kwentahon dayon kung pilay magasto ug mag-amot-amot dayon ang mga parents. Tungod sa ilang "unity" dali kaayo silang magkasinabot ug usa lang ka ginikanan ang mobulontaryo nga molukat og ticket ug siya ra sab maoy magpa-reserba sa ilang puy-anan didto sa maong lugar nga adtoan.
Walay daghang langas basta mga adunahan ang mga parents kay kung ordinaryo pa lang unta sila'g kahimtang, dili unta Ateneo ang ngalan sa ilang tunghaan ug posible nga Canduman Learning Institute lang.
Ang Magis Eagles maoy juniors champion sa Cebu Schools Athletic Foundation, Inc. (CESAFI) ug daghan pang mga torneyo sa Sugbo nga sila maoy nangharus ug lakip na niini ang Seaoil National Basketball Training Center (NBTC) ug saksi ako sa Game 3 sa NBTC Cebu City finals didto sa USC gym kaniadtong Pebrero 8 diin midaug ang Magis Eagles batok sa University of the Visayas (UV) Baby Lancers, 75-71 sa overtime.
Didto sa Ormoc, ilang gikunis-kunis ang New Ormoc National High School Eagles sa iskor, 102-49 ug sayong nahimong one-sided affair ang maong sangka sa NBTC East Visayas Regional finals didto sa Ormoc Superdome.
Gawas kang Engr. Araw-araw nga amahan sa akong sangay nga si Arc Gabrielle, ako sab mga higala ang ubang mga ginikanan sa players nga naglakip lanilang Raffy Senining, ang amahan ni Rendell Senining, Jack Huang nga uyoan ni Zacky Huang, Ronilo Padilla ang amhan ni Arnie Padilla ug si Benedict Chua nga duna sa'y anak nga umaabot player sa SHS-AdC.
Bag-ohay pa lang ako sa The Freeman, kanunay na akong makadungog sa ngalan Arcadio Araw-araw, ang kanhi banggiitang political leader sa barangay Pardo nga walay pilde-pilde hangtod nga siya maoy napiling presidente sa Association of Barangay Councils kon ABC ug siya diay maoy amahan ni Engr. Araw-araw. Pag-ingon pa "oh what a small world."
Sa paglabay sa daghang katuigan, nahimo nakong higala si Engr. Araw-araw ug kini tungod sa basketball. Karong umaabot pipila ka buwan, duna na sa'y laing anak si Engr. Araw-araw nga moduwa sa Magis Eagles ug siya mao si Nino, manghud ni Ar-G kun Arcadio Gabrielle.
MISCELLANEOUS. Today is the EDSA anniversary, a holiday and while there are no classes, it is a working holiday. Yesterday was the Cebu City Charter Day, supposed to be a holiday but too bad it falls on Sunday.