CEBU, Philippines - Gipakuratan sa Simple Likes Barbecue Haus ang MBD Law Firm human makaipsot, 87-86 sa F. Llamas Youth Association (FYA) 6th season basketballl tournament niadtong Miyerkules didto sa barangay Tisa gym ning dakbayan.
Ang kadaugan naghatag sa Simple Likes og 3-1 nga baraha ug nakamugna'g three-way tie alang sa unang puwesto uban sa MBD ug Hayleb.
Si Ryan Villaver miposa og 24 puntos alang sa Simple Likes, samtang sila si Noel Medalle ug McLean Alkuino nagkumboya og 31 puntos sa maong kadaugan.
Si Nico Laborte maoy nangu sa MBD Law Firm sa iyang 24 puntos, gisundan ni Baeng Medalle ug 21 puntos.
Sa sayo pa, ang Pastrano's Special Chicharon midaog sab batok sa Pimentel Brokers sa iskor nga 80-71.
Mirehistro si Tope Lavandero og 18 puntos alang sa Pastrano's, si Janus Abellana miamot og 14 puntos ug si Ariel Mayol mitampo og 13 puntos.
Ang napildeng Pimentel Brokers gipangulohan ni Ranel Patalita pinaagi sa iyang 27 puntos, gisundan ni Dexter Caballero nga adunay 24 puntos.
Ang FYA basketball tournament gipaluyohan sab ni Tisa Brgy. Capt. Tita Cabulao.
PUNTOS MATAG USA
Unang duwa:
Pastrano’s (80) - Lavandero 18, Abellana 14, Mayol 13, Abella 7, Dacayana 6, Pacubas 5, Carsano 5, Sydiongco 5, Conde 2
Pimentel (71) - Patalita 27, Caballero 24, Cajucson 6, Dumaguit 4, Jabonero 4, Lopez 3, Sumbihon 2, Avila 1
Ikauhang duwa:
Simple Likes (87) - Villaver 24, N. Medalle 16, Alkuino 15, Garcia 9, Dacayana 8, Abellana 8, Zapanta 4,
Cuyme 4, Villordon 2
MBD (86) - Laborte 24, B. Medalle 21, Lastomen 12, Antiporta 9, Abella 8, Masongson 4, Cañete 4,
Arreglo 4 (BANAT SPORTS)