CEBU, Philippines - Maghugot dinhi sa Sugbu ang mga tang- ang foreign triathletes sa tibuok kalibotan alang sa 3rd Vaseline Men Xterra Off-Road Triathlon Series sa Marso 2 ug 3 didto sa Liloan, Cebu.
Ang triathlon event gibahin sa Xterra Lite sa Marso 2 ug Xterra Philippines Championship sunod adlaw.
Ang Xterra Lite competition gilangkuban sa 500m swim, 20k bike ug 5k run, samtang ang mas kutas nga Xterra Philippines Championship adunay 1.5k swim, 35k bike ug 10k run.
Ning pagsulat, kapin na sa 300 ang narehistro sa maong dakung off-road triathlon race diin pipila niini gikan sa mga nasud sa Europe, Asia, Africa ug North ug South America.
Mga elite triathletes nga kompirmadong mosalmot mao sila si 2012 Xterra Philippine Champion Ben Allen sa Australia, three-time Xterra champion Sam Gardner sa Great Britain, Canadian champion Matt O’Halloran, 2012 Xterra women’s champion Renata Bucher, European champion Rory Downie ug Xterra South African queen Carina Wasle.
Gawas sa mga langyaw'ng entrante, anaa usab ang mga local bets ug celebrities sama nila ni Noy Jopson, Mateo Guidecelli, Liloan Mayor Duke Frasco ug Senator Pia Cayetano.
Niadtong gustong mosalmot, ang registration hangtod pa sa Marso 3 ug mahimong magparehistro sa tanang Runnr branches. May online registration sab pinaagi sa www.xterraphil.com.
Gawas sa luna alang sa Xterra World Championship didto sa Maui, Hawaii, ang mga winners sa maong lumba makadawat usab og $15,000 sa mga professionals ug P120,000 sa mga top Filipino finishers. (BANAT SPORTS)