CEBU, Philippines - Mokabat ngadto sa P22,000 nga ganting salapi ang giandam alang sa mga mananaog sa Deep Blue Open Chess Tournament karong weekend didto sa Deep Blue 'D Woodpusher's Chess Club nga nahimutang sa ikaduhang andana sa SM City-Cebu.
Mosubay ang torneyo og usa ka talagsaong two-stage format. Ang Stage 1 usa ka five-round Swiss system qualifying phase gamit ang Swiss manager chess program.
Ang top 16 players moabante sa Stage 2.
Ang kampiyon mobitbit og P7,000, ang second placer mobulsa og P4,000. Ang losing semifinalists makadawat og P1,500 matag usa ug ang losing quarterfinalists hatagan og P1,000 matag usa. Kadtong masulod sa top 16 segurado na nga makadawat og P500.
Ang registration nagkantidad og P200. Ang organizers modawat og on-site registration apan hangtod sa alas-10:20 sa buntag sa Sabado.
Gipasiugdahan sa Deep Blue 'D Woodpusher's Chess Club, ang duha ka adlaw nga torneyo gisuportahan sab ni Atty. Mariano Tan, Carlos Tan, Engr. Blas Hipulan ug Ethi Dominguito.
Alang sa dugang mga kasayoran, niadtong interesado mahimong mokontak ni international arbiter Marvin Ruelan sa 0926-7352951. (BANAT SPORTS)