CEBU, Philippines - Dili lang usa o duha, kun dili tulo gyud ka korona ang nasakmit sa University of San Carlos (USC) booters sa bag-o lang nahuman nga 3rd Sinulog Football Festival nga giduwa sa managlahing binyu sa miaging adlaw.
Ang USC-A milangkat sa premiere's men's open crown human nila sirohi ang paboritong Hiroshi-Guardo FC, 5-0 didto sa USC-TC field sa Talamban, ning siyudad.
Miabante sila sa final round human sa ilang 2-1 nga kadaugan batok sa Panalpina.
Sa pikas bahin, ang USC misakmit sab sa korona sa women's division human midaog batok sa D'Ladies squad, 1-0.
Ang USC miangkon sa katapusan nilang korona pinaagi sa 18-under division human sab nila sirohi ang Sacred Heart School-Ateneo de Cebu (SHS-AdC), 2-0.
Bisan pa sa ilang kapildihan, ang SHS-AdC angay sab nga magmaya kay ilang gidominar ang 11-under division ug sa girls 15-under category kortesiya sa 1-0 nga kadaugan batok sa San Roque FC pinaagi sa penalty shootout.
Mao sab ang Abellana National-Pomeroy, Paref-Springdale, Don Bosco Razkals, Innodata ug Canduman nga nanghawod sa tagsa-tagsa ka dibisyon.
Ang ANS naghari sa boys 18-under, samtang ang Paref-Springdale nanghawod sa 15-under, ang Innodata-A
nidominar sa inter-BPO division batok sa igsuong koponan Innodata-B, 3-2 pinaagi sa shootout.
Ang Canduman nanghawod sa boys 13 class human gipilde ang SHS-AdC, 5-4 pinaagi gihapon sa penalty shootout.
Ang ERCO FC milangkat sa 38-above title batok sa Queen City United-A sa iskor nga 2-0. (BANAT SPORTS)