CEBU, Philippines - Mosikad na karong adlawa ang 11th Tour ni Frank diha sa luyong bahin sa Cebu Doctors’ University sa Mandaue City north reclamation area.
Gipasiugdahan ni Frank Gatdula ug sa Cebu Cycling, ang lumba nga giisip nga labing taas nga cycling event sa Sugbu gibuak sa duha ka dibisyon -- B ug C.
Walay kompetisyon sa Class A kay ang elite riders adto man mopakita’g aksiyon sa Road Pilipinas 2013 nga karon usab sugdan didto sa Zamboanga City.
Laktod pagkasulti, ang Class B ug C riders lang ang magtigi sa criterium karong adlawa ug road race nga ipahigayon ugma.
Sa criterium, ang class C riders mosikad sud sa 30 minutos ug dugang tulo ka laps sa maong lumba, samtang ang class B adunay 40 minutos ug tulo sab ka laps.
Alang sa road race, ang rota molatas sa Toledo-Balamban-Transcentral Highway sa Busay.
Ganting salapi, medalya ug giveaways ang madawat sa mga top performers.
Ang ubang mga partisipante mahimo usab makadaog og premyo gikan sa event sports nga naglakip sa Vios
Construction, Cycle Logic, Vellum Cycles, Creative Sounds DJ, PaulDP Creations ug Kia Motors pinaagi sa ripa atol sa
awarding ceremonies. (BANAT SPORTS)