CEBU, Philippines - Mosugod ang Queen City United (QCU) sa ilang kampanya sa Visayas elimination sa Philippine Football Federation (PFF)-Smart National Club Championships karong adlawa didto sa Silliman ballpark sa Dumaguete City.
Ang QCU nakakuha og katungod nga morepresentar sa Cebu Football Association (CFA) sa men's open battle human manghawod sa Aboitiz Cup football tournament sa miaging tuig.
Naglangkob sa QCU mao ang goalkeepers nga sila si Charles Villarta ug Benjamin Sanchez, Junard Aguilar, Jhonny Dalman, Rene Menchavez, Siegfred Apurado, Rommel Cuizon, Joseph Rodriguez, Samson Olaniyi, Albert Nangkil ug Carlito Abadia (midfielders), Dan Villarico, Ariel Cahilig ug Jade Paghubasan (forwards) Limhar Baunsit, Bryan Eborda, Marion Cubelo, Ryoji Inoue, Miguel Gonzales ug Frederick Isic (defenders).
Ang Kenyan forward nga si Ben Rotich gibutang sa reserve list uban ni defender Nicholas Villacin ug goalie Prime Agang.
Duha na lang ka koponan ang makontra sa QCU sa regional qualifying human miatras ang Iloilo Football Association (IFA) ug Negros Oriental Football Association (NOFA).
Sangkaon sa QCU mao ang Negros Occidental FA-Ceres ug Leyte FA.
Duha lang sa tulo ka teams ang moabante sa round of 16 nga kumbatihan sa walo ka regional qualifiers lukop nasud ug top eight squads gikan sa UFL. (BANAT SPORTS)