CEBU, Philippines - Nagpabilin gihapon nga walay pilde sud sa upat ka duwa ang Bureau of Customs (BOC) cagers human nila gilubong ang Court of Appeals (CA), 82-56 sa Association of Regional Executives in National Agencies (ARENA) Region-7 basketball tournament 2012 didto sa DPWH-SRP covered court, ning dakbayan.
Nagmangtas ang Customs sa third period diin ilang gipabuthan og 33-4 nga bomba ang ilang karibal aron moposte sa labing daku nilang labaw nga 38 puntos, 63-25 paingon sa final period kortesiya ni team captain Jingjing Rama, Bingo Matugas ug Boodee Monteño.
Misuway unta pag-rally ang CA sa fourth period ubos sa pagtimon nilang Robert Angco, Josper Español ug AR Verano, apan ang ilang 31-19 nga scoring run dili pa gihapon igo nga makapapas sa dakung labaw sa Customs.
Si Monteño maoy nangu sa Customs nga miposa og 14 puntos, samtang sila si Rama ug Matugas adunay 11 puntos matag usa.
Ang napildeng CA gipangulohan ni Angco pinaagi sa iyang 17 puntos, gisundan ni Verano nga adunay 15 puntos, samtang si Español midugang og 10 puntos. (BANAT NEWS)
PUNTOS MATAG USA
CUSTOMS (82) - Monteño 14, Rama 11, Matugas 11, Cañete 8, Manahan 7, Mabalo 7, Mose 6, Tan 6, Velez 4, Capalan 4, Dela Cruz 2, Laraga 2
CA (56) - Angco 17, Verano 15, Español 10, Gorrero 6, Rago 6, Cagulada 2