CEBU, Philippines - Tinguha sa batan-ong FYA-Martinez Brokers nga mokulit sa ilang ikaduhang daog alang sa solong liderato karong gabii dihang makigtakos sila batok sa kugihan nga Alin Brokers sa main game sa nagpadayong 1st Cebu International Port Users (CIPU) basketball tournament sa Basak gym, ning dakbayan.
Ang duwa himoon sa alas 8 sa gabii nga mosunod sa preliminary game tali sa Petracorta Brokers batok sa "unpredictable" nga Avenido Brokers. Parehong mikulit og upset ang Avenido ug Alin sa miaging semana sa wala pa mobakasyon ang mga players aron sa pagtamud sa All Saints Day ug All Souls Day,
Midaug ang Alin Brokers batok sa mas paboritong Cebu Basketball Mania Association (CEBAMA) nga igpalig-onan sa managsuong Jury ug Jeff Garcia kinsa parehong opisyales sa CIPU samtang gipakuratan sab sa Avenido ang Kentkyle Cuisine ni Kenneth Maningo pinaagi sa overtime sa miaging semana.
Sa kasamtangan, ang FYA ug Canillas Customs Brokerage ni Roy Canilla mao na lang ang wala pay pilde sulod sa pito ka teams.
Ang FYA-Martinez gibanderahan sa managsuong Noel ug Baeng Medalle, ang mga board of directors sa CIPU.
Karong Sabado pa mopakita'g aksyion ang CEBAMA ug ang Canillas Brokers ug gikatakdang mobalik dinhi sa Sugbo si Jury Garcia, ang operations manager sa PIL Shippping Lines aron lang moduwa diin tinguha nilang makarekober sa ilang pakyas nga debut game sa miaging semana.(BANAT )