Segun sa nabasa nakong mga taho, adunay gi-andam nga "hero’s welcome" ang mga Pinoy alang nila ni Manny Pacquiao ug sa iyang manghod nga si Bobby sa ilang pagbalik sa nasud. OK lang kini alang ni Pacquiao gumikan kay midaog man siya batok ni Juan Manuel Marquez. Apan nganong apil man gud si Bobby nga wala man gani siya makalahutay og usa ka hugna batok sa Mehikanong si Urbano Antillon. Kun mangahas si Bobby nga mo-apil sa caravan ni Pacman, mas maayo nga magmaskara siya.
* * *
Unsa kaha ang tinuoray nga gibati ni kanhi Presidente Joseph Estrada? Puwerte man gyud niyang lipaya ug pakpak human gi-anunsiyo ni Michael Buffer nga si Pacman maoy mananaog. Samtang nagtutok si Erap sa telebisyon, nakita man gud sa luyo ni Pacquiao ang mortal niyang kaaway nga si Chavit Singson nga puwerte sab kaayong dakoa og tingsi.
* * *
Sa akong tan-aw sa away, daog si Marquez og dos puntos. Nahitala sa personal nakong scorecard nga si Marquez daog sa iskor nga 114-112. Apan wala ko matingala nga si Pacman maoy gideklara nga daog gumikan sa kasikit sa maong away nga bisan asa nilang duha ang mopatigbabaw segun sa tan-aw sa mga judges.
Para nako nabuligan og suwerte si Pacman sa iyang kalampusan. Bisan kapila pa nato tan-awon ang replay sa maong away, klaro kaayo nga si Marquez maoy daog sa round one. Sila si judges Jerry Roth, Duane Ford ug Tom Miller mihatag niya sa maong hugna.
Ang tulo ka mga hurado mi-iskor sab pabor ni Pacquiao sa ika-10 nga hugna nga maoy nagselyado sa iyang kadaugan puwera na lang kun natumba siya ni Marquez sa katapusang duha ka hugna. Labaw sa tanan, daku kaayo og papel sa kadaugan ni Pacman ang pagpalukapa niyang Marquez sa ikatulong hugna.
* * *
Apan duna pay uban nga dili hikit-an nga butang nga nahimong yawi ni Pacman pag-abli sa pultahan sa himaya. Kini mao ang talagsaon niyang kaisog. Bisan og halos dili na siya makakita gumikan sa dakung gisi sa ubos nga bahin sa tuo niyang mata nga iyang nahiaguman sa ikapitong hugna, wala kini motalaw. Misamot hinuon ang iyang kabangis, timaan sa malig-on nga kasingkasing sa mga Pinoy nga dili basta-basta mahugno sa bisan unsa matang sa mga pagsulay ug hagit sa kinabuhi.
Angayan sab natong daygon ang cutman ni Pacman nga si Joe Chavez nga nindot kaayo nga midala sa mahinungdanon niyang papel. Dali nga napahunong ni Chavez ang pagdagayday sa dugo gikan sa samad ni Pacman. Gani human sa away, mura og walay gisi ang nawong ni Pacman kay maayo kining pagkasira ni Chavez.
* * *
Gawas nga iyang gipamatud-an nga siya maoy labing banggiitan nga boksidor karon sa tibuok kalibutan ubos sa super featherweight division, angayan sab natong ikapasigarbo si Pacman gumikan sa pagkulit niini og kasaysayan.
Niadtong wala masayod, si Pacquiao maoy nahimo nga labing unang three-division world boxing champion sa Asya human niya sakmita ang WBC super featherweight belt ni Marquez.
Niadtong 1998 si Pacquiao gikoronahang WBC flyweight champion human palukapaha sa ikawalong hugna si Thai Chatchai Sasakul. Sa tuig 2001, nahimo siyang IBF super bantamweight champion human patikangkanga sa ikaunom gihapon nga hugna si South African Lehlohonolo Ledwaba. Hinuon padayon pa ang tahas ni Pacman pagkabkab og kadungganan ug sunod niyang puntingon mao si WBC lightweight champion David Diaz.
Kun magpadayon ang iyang pagpangharos, sa tuig 2010 usa na ka sertipikadong bilyonaryo si Pacman.
* * *
Alang sa inyong mga reaksiyon mahimong mo-email sa mannix_80@yahoo.com