Asa ka kakita og bus terminal nga mihatag og libreng sakay, libreng pagkaon, libreng comfort room ug naa pa ang libreng medical services sa mga pasahero? Mora’g sa Sugbo ra, ang North ug ang South Bus Terminal nga gipasiugdahan sa kapitolyo.
Ang libreng sakay alang ra sa priority sector sama sa PWD, mabdos, senior citizens ug mga masakiton, samtang ang pagkaon nga usa ka cup sa rice ug naay topping nga sud-an nga makatul-id na gyud sa tinae sa kabusog, libre pa gyud diay ang tubig. Alang kini sa tanang mga pasahero until supply last matud pa sa tagdumala sa terminal nga si Ahmed Cuizon. Una nang gilibre ang terminal fee sa mga bus ug taxi isip tabang sa mga driver ug operator nga naapektohan sa fuel price hike.
Ang inisyatibo sa Cebu provincial government ubos ni Governor Pamela Baricuatro ug sa pagdumala sa mga terminal ubos ni Ahmed Cuizon—ang paghatag og libreng pagkaon, libreng sakay sa mga vulnerable sectors, ug libreng medical services atol sa Adlaw sa mga Minatay—usa ka dalaygon kaayo nga paningkamot nga nagpakita sa tinuod nga diwa sa pagpakabana o malasakit sa katawhan.
Dako kaayo og natabang ang mobile kitchen sa PDRRMC ug ang walay bayad nga sakay ug medikal nga konsulta. Alang sa mga pasahero nga igo-igo ra ang badyet ug nag-atubang sa taas nga galastuhan sa biyahe pauli sa probinsya, kining maong tabang nagpakita nga ang gobyerno anaa nag-atiman sa ilang kaharuhay.
Bisan pa man sa dakong kalipay sa mga tawo sa libreng serbisyo, angayan usab palandongon nga kini nga mga programa kasagaran mahitabo lamang sa mga dako nga okasyon o holiday rush. Ang hagit karon sa lokal nga kagamhanan mao kon unsaon pagmugna og mga malungtarong palisiya o programa nga makatabang sa mga pasahero dili lang sa panahon sa Kalagkalag, kundi lakip na sa matag adlaw nga pagsaka sa presyo sa mga palaliton.
Ang pagdagsa sa mga tawo sa mga terminal nagkinahanglan og estrikto nga kahapsay ug disiplina aron ang mga libreng serbisyo (sama sa pagkaon ug libreng sakay) maabot gayod sa mga labing nagkinahanglan nga walay magubot, hinoon malinawon ug malamposon ang programa. Ang hapsay nga pagdumala sa terminal ang magpamatuod sa kalampusan sa maong maluloy-on nga proyekto.
Sa katapusan, ang maong programa usa ka maayong panig-ingnan sa epektibong public service, apan kinahanglan kini padayonon ug palapdan aron ang matag Sugboanon mobati sa pag-atiman sa gobyerno sa tibuok tuig, dili lang sa panahon sa kasaulogan.