Ang pasangil sa kanhi polis nga si Rodolfo Gracioso Jr. nga nidawat si Bise Presidente Sara Duterte og mga maleta nga gisudlan og laing menos P2 bilyones walay kalainan sa pasangil sa 18 ka kanhi marines nga nakahatod og mga maleta ngadto nilang Presidente Ferdinand Marcos Jr. ug ubang mga opisyal sa gobyerno.
Sa ato pa, dili angay nga tuohan dayon. Kinahanglan pang susihon duna bay lig-on nga mga ebidensiya. Gawas sa mga letrato sa mga maleta ug sa mga sakyanan nga gikargahan ug sa mga opisyal nga giingong gihatdan.
* * *
Pero nakaangkon og dugang gibug-aton ang pasangil human nabisto nga nibiya sa Pilipinas silang kanhi House Speaker Lord Alan Velasco ug ang iyang asawa nga si Rowena Amara Velasco nga ginganlan ni Gracioso nga maoy nagsugo niya paghatod sa kuwarta ug ubang mga gasa ngadto ni VP Sara:
Si Lord Alan nibiya para Japan niadtong Agosto 30 ug gitakdang mobalik niadtong Septiyembre 14 pero wala pa mopauli hangtod karon; ug
Si Rowena nibiya para Hong Kong niadtong Septiyembre 24 ug gitakdang mobalik sa Septiyembre 27 pero wala pa sab mopauli.
* * *
Giangkon sa Philippine National Police (PNP) nga nadestino si Gracioso isip security escort ni Lord Alan. Mas klaro kay sa sulti sa Armed Forces of the Philippines (AFP) nga upat sa 18 ka nangangkon nga kanhi marines dili mga sundawo ug mayoriya nataktak tungod sa mga atraso pero wala maghingalan og mga ngalan.
Gikumpirmar sab sa PNP ang mga atraso ni Gracioso: Nataktak niadtong Septiyembre 11 karong tuiga; nasuspenso og katulo; ug napriso og kaduha.
* * *
Nipasalig ang National Bureau of Investigation (NBI) nga susihon tinuod bang mga letrato nga gipakita ni Gracioso, motakdo ba sa tinuod nga mga panghitabo ang mga petsa ug mga lugar nga gihisgutan sa iyang affidavit.
Ipatawag sab sa NBI ang mga indibiduwal nga ginganlan ni Gracioso nga apil sa hinatagay og kuwarta ug mahalong mga sakyanan, chocolates, bags ug relo. Apil na silang VP Sara, magtiayong Lord Alan ug Rowena (kon mobalik pa sa Pilipinas), Kongresista Miro Quimbo sa Marikina, Jeffrey Tupas (sinaligan ni VP Sara), Ramil Madriaga, kanhi Kongresista Mikee Romero ug Raymond Ronquillo sa R33 Car Exchange.
* * *