Nagsugod na unta sa pagdasok sa buhatan sa Commission on Election o Comelec ang mga mokandidato sa Nobyembre 2, 2026 nga Barangay ug Sangguniang Kabataan nga eleksiyon kay gitakda sa Comelec ang Septyembre 28-Oktobre 5 2026 ang filing sa Certificate of Candidacy sa mga magpapili.
Apan gikanselar sa Comelec ang ilang kalendaryo sa kalihokan parte sa piniliay human gipirhan ni Presidente Bongbong Marcos Jr. ang balaudnon nga nag-fix sa termino sa mga Barangay ug Sangguniang Kabataan nga opisyal.
Sa pagsuwat ning akong lindog, wala pa maduso ni Atty. Romulo Macalintal ang iyang petition batok sa napirmahang bagong balaud.
Dako ang akong pagtuo nga kun ugaling idayon gyod ni Atty. Macalintal ang iyang petition batok sa " term fixing law" isalindot lang kini sa Korte Suprema tungod kay iyaha lamang nga gahom sa Kongreso ang pagfix sa termino sa mga opisyal sa Barangay ug Sangguniang Kabataan. Ang tumong ug tuyo sa "term fixing law" mao paghimo nga lima ka tuig na sa termino sa mga opisyal sa Barangay ug SK ug dili ang pagpostpone sa eleksiyon.
* * *
Aprobado na sa National Wages and Productivity Commission ang P42 nga umento sa suholan sa mga minimum wage earners dinhi sa Central Visayas nga gilangkoban sa Bohol ug Cebu. Dinhi sa Sugbo ang mga minimum wage earners sulod sa Metro Cebu areas o gikan sa Carcar City paingon didto sa Danao City lakip na ang lungsod sa Cordova ug Lapu-lapu City mahimo nang P582 ang matag adlaw nga suholan sa mga minimum wage earners.
Moepekto kini 15 ka adlaw sugod kagahapong adlawa Septyembre 28, 2026. Giumentohan usab og tag P500 matag buwan ang suholan sa mga domestic helpers, busa tag P7,500 na ang binuwan nga suholan sa mga katabang sa panimalay. Mao kini ang gipahibawo ni DOLE Secretary Francis Tolentino. Sa Metro Manila gisugdan na ang pagpatuman sa P60 nilang umento sa suholan.
Ning maong umento, makaigo kaha kini sa inadlawadlaw nga gastoanan sa pamilya? Dili gyod maong paigoan nalang.