Atol sa pagdungog sa impeachment case batok kang Bise Presidente Sara Duterte, gibansiwag ni defense counsel Mark Vinluan ang 80% nga bar exam rating sa bise presidente. Gibadlon hinoon siya sa presiding officer tungod kay gawas nga kini immaterial, maingon usab nga wala kini respeto sa ubang abogado nga posible’ng diyotay ra ang rating. Makapahinumdum sa akong amigong abogado nga dili ganahan mokanta sa videoke labi na kadtong adunay rating nga mogawas matag human og kanta. Ang iyang rason mao nga, “Ning-pasar na baya ko sa bar exam, unya sa videokehan, mahagbon na hinoon ko!” Fezteleern!
Kinwanggol nga pagtoo
Gikwestiyon sa mga impeachment prosecutors ang kaangayan ni VP Sara Duterte nga mahimong presidente uban ang pagpadayag sa ilang kahingawa sa iyang temperamento gumikan sa iyang bayolenteng mga hulga batok kang Presidente Marcos, Jr. Kon mao kana, wala diay gi-impeach ang bise presidente tungod lang sa gitouhan niya’ng mga kalapasan sa Konstitusyon kon dili aron maseguro gayod nga dili siya makadagan pagka-presidente karong 2028. Angayan hinumduman sa prosecution ang pahimangno nga “Dakong sayop ug kinwanggol ang pagtoo nga ang pag-guba nimo sa uban, makapa-anindot sa imong pagkatawo.” Muleeng!
Napriso kay makasulti man
Bisan pa sa tulo ka adlaw nga protesta sa mga sakop sa Iglesia ni Cristo, (INC), gipasakaan gihapon sa Ombudsman og kasong plunder si Sen. Rodante Marcoleta ug si kanhi Kongresista Michael Defensor ug laing duha ka kauban. Mahinumduman nga bokal kaayo si Senador Marcoleta ug Defensor batok sa kuyanap nga kurapsyon sa administrasyon labi na sa anomaliya sa flood control projects. Makapahinumdum kining nahitabo sa duruha sa Uwak nga nangutana sa Periko kon ngano nga nasulod kini sa halwa. Niini mitubag ang Periko nga “Napriso ko tungod kay makasulti ug makapanaway man ko.” Madahaan!
“Last na lang ka!”
Gipanalipdan ni Cebu City Mayor Nestor Archival ang wala niya pagtunga sa pagsaulog sa dakbayan sa ika-10 ka tuig nga anniversary sa landmark West Philippine Sea arbitral ruling human gisaway kini ni Bise Mayor Tomas Osmea kinsa mi-akusar sa mayor nga “nag-play safe” o milihay sa isyu sa WPS taliwala sa diplomatic protest sa China. Walay lipod-lipod ug walay pagtamud ang pagpanaway ni Osmeña batok kang Archival. Apan mapa-ubsanon lang gihapon kining gitubag sa mayor. Ang pangutana sa kadaghanan, niining pagpunay’g birada ni Osmena batok ni Archival, kanus-a kaha moingon ang mayor sa iyang bise nga, “Last na lang ka ha!” Hala noo!
Bahala’g pildi, kumbati
Mipasar og resolusyon ang Mandaue City Council nga nag-awhag sa Department of Education (DepEd) sa pag-integrate sa pickleball sa sports program sa ahensya uban ang paghangyo sa Mandaue City Sports Commission nga i-apil usab ang pickleball sa development initiatives sa dakbayan. Nagka-sikat na ang maong duwa nga gikahimanan sa tanan, bata man o edaran. Kay matud pa sa mga players, “Kini ra ang duwa nga bahala’g mapildi basta nag-ngisi, ug bisan masapid na sa linya, mokaryada gihapon si Lola.” Pagkatoytoy!