Nindot kining lakang sa kadagkoan sa Land Transportation Office sa Central Visayas nga mo-hire sila og daghang deputized agents aron epektibo nila nga mapatuman ang balaod sa trapiko ngadto sa mga driver nga badlongon.
Pagka karon hinoon, ang i-hire sa LTO nga mga deputized agents kadto lang mga polis ug kawani sa kagamhanan nga nadestino sa pagpatuman sa balaod sa trapiko.
Para nako, nindot nga balikon sa kadagkoan sa LTO kadtong pagtugot nila sa mga civilians nga mahimong deputized agents, apan pilion lang ug kadto lang gyud nga mga dili corrupt.
Kadtong grupo kaniadto nga Task Force Alpha (TFA) epektibo gyud kaayo to, saksi gyud ko nga tinarong ang ilang pagserbisyo.
Angkonon hinoon nako nga dunay usa ka higayon nga may sakop niini nga nangilkil apan gitaktak dayon.
Katulo sa usa ka semana maghimo’g operations ang mga sakop sa Task Force Alpha kaniadto, ug sulod lang sa duha ka oras gikan sa alas 5:30 sa hapon hangtud sa alas 7:30 sa gabii.
Gituyo ni kay ang mga dawaton nga sakop sa Task Force Alpha kadto rang dunay mga trabaho, dili modawat og mga way trabaho kay anaa diha ang tentasyon kay wa man sila’y income.
Matud ni LTO-7 Regional Director Wendell Dinglasan nga pagka karon miabot na og 200 ang ilang mga depuitized agents sa Cebu ug Bohol, nga naglangkob sa mga polis ug traffic enforcers sa lainlaing syudad ug lungsod.
Giangkon ni Dinglasan nga kon ang mga regular agents lang sa LTO-7 maoy saligan sa pagpatuman sa mga lagda nga gilatid sa Republic Act 4136 ug sa mga DOTr memorandum circularss, dili sila epektibo kay gamay ra kaayo sila.
Samtang gusto ang mga traffic enforcers nga mahimo sila nga deputized agents sa LTO, apan gihulagway nga dili sayon kay dunay sumbanan kon kinsa ang dawaton, ug ipaagi kini sa written examinations.
Diha’y higayon nga sa kapin 30 ka traffic enforcers sa Cebu City nga gipa-take og examination sa LTO, duha ra ang nakapasar.
Ang laing isyu mao nga dunay mga local government units nga gimandoan ang ilang mga traffic enforcers nga nahimo na nga LTO deputized agents nga dili nila biyaan ang pag-isyu og Traffic Citation Tickets sa madakpang driver.
Kini aron nga ang multa sa mga driver nga makahimo og salaod sa pagmaneho, mahipunta sa panudlanan sa LGU, kay kon Temporary Operator’s Permit (TOP) ang gamiton, ang kuwarta nga makolekta gikan sa multa, adto man mahipunta sa nasudnong panudlanan.
Daghan gyud nga mga sibilyan ang gustong mahimong deputized sa LTO, apan wa na kini itugot pagka karon.