Seryuso kaayo ang hulga sa kabataan bahin aning mga mga bayolenteng online games nga giingong gigamit sa mga dautang mga tawo para hulhogan ang mga kabataang na-addict og duwa niini, para mobuhat sila og dautan.
Ning tuiga lang, 19 ka mga menor de edad ang na-rescue sa kapolisan gikan sa pagbuhat unta og mga krimen diha sa ilang mga eskuylahan. Sagad nila, tigduwa og Roblox.
Kinahanglang seryusohon kini sa mga ginikanan kay dili ni tiaw nga hulga, naay mga menor de edad sa Calamba nga nasakpang padung mamusil sa eskuylahan.
Ning bag-ohay lang sad didto sa Tacloban City, namusil ug nakapatay gyud ang duha ka menor de edad, ang usa nila naungo sad og duwa anang Gorebox. Ang ingon sa mga imbestigador sa PNP-Cyber Crime Unit, naay mga tawong gigamit ang maong mga bayolenteng online game para mang-recruit og kabataan, kasagaran mga nag-edad og 14 hangtud 15 anyos para magbuhat og krimen.
Amiguhon sila pinaagi sa chat room sa maong duwa ug didto hatagan sila og mga challenges nga kinahanglan nilang buhaton, bugti sa paghatag sa ilang mga points o game coins o ba kaha mga items nga magamit nila sa duwa aron mosaka ilang ranggo.
Una niini, diha sila amiguhon sa chat box, ug imbitahon pagsulod sa laing site sama sa Telegram ug didto sila tudloan aron mahimong radikal o nihilistic violent extremism (NVE), diin patuohon ang mga bata nga dunay dakong problema ang katawhan ug sila maoy solusyon pinaagi sa pagpatay.
Dili lang kini nahitabo dinhi sa Pilipinas, nag-atubang og susamang problema ang ubang mga malambuong mga nasud niini, sama sa nahitabo sa Amerika diin daghan ang nahitabong school shootings ug bisan sa Uropa.
Mismo ang United Nations Security Council Counter-Terrorism Committee Executive Directorate sa gipagawas nilang October 2025 report , nagpakita nga 42 porsiyento sa giimbestigar nilang terorismo sa Uropa ug North America, mga bata ang suspek.
Lain pang giatubang nga hagit sa mga otoridad mao ang reaksyon sa mga ginikanan kay ang uban dili sila modawat nga ang ilang anak hinayhinay nga na-radicalized ug nanghulga nga kasohan ang mga otoridad tungod niini.
I-ban man o dili kaning mga bayolenteng online games, ang mga ginikanan gihapon ang dunay dakong papel para bantayan ilang mga anak.