Basi sa survey nga gihimo sa Social Weather Station (SWS) sa ikatulong kuwarter hangtod buwan sa Marso ning tuig 2025 migawas nga ang Visayas maoy adunay pinakadaghang gipanggutom nga miabot og 33.7 porsiyento.
Gisundan kini sa National Capital Region nga adunay 28.3, Mindanao nga adunay 27.3 ug Balance sa Luzon nga adunay 24 porsiyento.
Sa buwan sa Marso tuig 2013 panahon sa administrasyon ni Presidente Noynoy Aquino sa samang pagtuon sa SWS, migawas nga ang Mindanao mao ang adunay pinakadaghang gigutom nga miabot og 29.2 porsiyento ug gisundan kini sa NCR nga adunay 21.7, Visayas Region nga adunay 15 porsiyento ug Balance sa Luzon nga adunay 14.7 porsiyento.
Samtang sa samang buwan sa Marso tuig 2019 sa administrasyong Rodrigo Roa Duterte migawas sa pagtuon sa SWS nga ang National Capital Region ang dunay pinakadaghan og gigutom nga miabot og 11.7 porsiyento.
Gisundan kini sa Luzon nga adunay 10.3, Visayas nga may 10.0 ug Mindanao nga adunay 6.1 porsiyento.
Kun imong itandi ang tulo ka administrasyon, imong makita nga ang administrasyong Duterte ang may pinakagamay og gigutom ug ang administrasyong Marcos ang may pinakadaghan og gigutom.
Kun imo gihapon nga itandi, ang administrasyong Marcos ang may pinakadaghang ayuda nga gihatag kay sa administrasyong Duterte gawas niadtong panahon sa Covid-19 nga pandemic.
Ang pangutana nganong daghan mang gigutom sa administrasyong Marcos?
Tungod ba sa kadaghang ayuda? Bisan ang Malakanyang naglibog sa pagsabot.