Nagkadaghan na karon ang mga bag-ong matang sa alternatibong transportasyon sa publiko pinaagi aning mga e-bikes, e-trikes ug mga e-cars. Sa tulo, kaning e-bikes ug e-trikes maoy pinakadaghan nga nagdagan na karon sa kadalanan. Gawas sa personal nga transportasyon sa mga pamilya, daghan na ang gigamit karon nga e-trikes sa panginabuhian. Ang pinakadaghan mao kining mga pasaheroan.
Sa Barangay Mambaling, Ermita, Pasil ug Suba sa Cebu City makita ang daghan niini nga mga pasaheroan. Makiglumba ug makig-patentero sa mga sakyanan ug mga dagkong trak diha sa dalan nga murag walay kahadlokan.
Maayo kining gisugyot sa Talisay City nga buot nilang ipatuman, nga limitahan ang pagbaligya aning mga e-bikes ug e-trikes kay usa sa rason mao, nakatampo na sila sa problema sa traffic sa siyudad kay nadiin-diin ra man sila og lusot.
Makiglumba na sa mga regular nga trisikol ug mga pasaheroang minibuses. Gawas pa, wala gihapon sila matarong tanan og regulate maong ang uban mura og mga gerilya sa ilang pamasahero likay-likay sa mga nagbantay, ang resulta madisgrasya luoy ang mga pasahero. Dili sayop o dili dautan ang pagbaton ug paggamit niini, apan angay sab unta nga dili moabusar ang mga drayber niini. Hain naman tong mga giingon nga i-regulate na kining mga e-bikes ug e-trikes sa kadalanan? Kutob lang estorya?
Kadtong sugyot nga kinahanglang rehistrado sa Land Transportation Office kining mga e-bikes ug kinahanglang adunay lisensiya ang mga drayber ani? Napatuman ba gyud?
Ang alternatibong transportasyon gamit kini nga teknolohiya makatabang og dako sa pagpamenus sa polusyon sa nasud, apan kun dili kini i-regulate mapuno lang kini sa kasamtangang problema sa trapiko karon.
Kinahanglan sab nga adunay tulubagon ang mga tagiya ug drayber niini sama sa regular nga mga sakyanan tungod kay nikaon sila og espasyo diha sa kadalanan ug tanan pwedeng maaksidente.