Gamay na lang og kuwang nga apurahon sa administrasyon ni Presidente Ferdinand Marcos Jr. ang International Criminal Court (ICC) pagpadakop ug pagsugod na sa husay sa pasangil sa crimes against humanity batok ni kanhi Presidente Rodrigo Duterte ug mga sinugo sa peke niyang drug war.
Mao ni ang lanog nga implikasyon sa pahibawo ni Justice Secretary Boying Remulla nga gihikay na ang ilang pakigsulti sa kadagkoan sa ICC. Nga dakong balitok sa gibalikbalik nga baruganan sa presidente nga dili sila motabang kay dili na sakop ang Pilipinas sa kalibotanong korte.
* * *
Sa wala pa makabuylo ang demanda sa mga Duterte nga angay nga palagputon sa puwesto si Remulla tungod sa pagsukwahi sa presidente, niapas sa pagpahibawo si Executive Secretary Lucas Bersamin nga ipatuman sa gobyerno ang warrant of arrest nga mahimong luwatan sa ICC kon ipaagi sa International Criminal Police Organization (Interpol).
Human sa nasudnong pagkahagsa nga natapos na lang ang 2024 wala pay naposasan sa extrajudicial killings (EJKs), ang mensahe ni Remulla mahimong gitumong pagkumbinser sa ICC nga dili sila angay nga maglangay kay dili managana ang gobyerno pagtabang nila.
* * *
Kay dili man kadiktar ang gobiyerno sa sunod nga lihok sa ICC, gisugo ni Remulla ang pag-imbestigar sa mga kaso nga na-utingkay sa House Quad Committee ug ubang EJKs atol sa administrasyong Duterte sa 2016 hangtod sa 2022.
Ang mensahe ni Remulla dili lang palagot sa mga Duterte kon dili posibleng gitumong sa pagseguro nga ang mao pay pagsugod nga imbestigasyon sa gobyerno dili mosapaw sa mas nakabuylo nang pakisusi sa ICC.
* * *
Ubos sa Republic Act No. 9851, ang International Humanitarian Law sa Pilipinas nga napasar sa 2009, mahimong motabang ang Pilipinas sa langyawng mga korte. Gawas pa,bisan dili na sakop ang Pilipinas, duna gihapoy hurisdiksyon ang ICC sa mga krimen nga nahitabo sukad sa Nobyembre 2011, kanus-a nagpasakop ang administrasyon ni anhing Presidente Noynoy Aquino, hangtod sa Marso 2019, kanus-a nigawas si Duterte.
Sa ato pa, mahimong imbestigahon sa administrasyong Marcos ang EJKs ni Duterte human sa Marso 2019 nga dili masapawan ang siyam ka tuig nang imbestigasyon sa ICC. Kon magkatinabangay, mahimong mas mapalig-on ang ilang masig ka mga kaso.
* **