Mitiyabaw karon ang mga molupyo sa sitio Tagbuag Tubig sa Barangay Tagjaguimet sa siyudad Naga sa paghugpa sa mga langaw sa ilang dapit, dili lang sa naasoy'ng barangay nidagsa ang mga langaw apil na sa mga kasikbit kuno nga dapit.
Gitumbok nila nga hinungdan niini ang poultry nga naa mahimutang sa dapit diin nangalisbo ang kabaho sa iti sa mga manok. Base sa video nga gipadala sa usa ka molopyo sa dapit manggimok ang atong kaunoran nga magtan-aw kay gabanig ang langaw sa kadaghan.
Perwisyo kaayo sa mga tawo kay anad kaayo ang mga langaw nga dili mahadlok og bugaw sa mga tawo, nabali na kay ang mga tawo na ang nangahadlok sa mga langaw. Kinsay dili mahadlok nga delikado man kaayo kining mga pestiha kay nagdala kini og kagaw nga seguradong hinungdan sa mga sakit.
Nabalaka ang mga molupyo sa kahimtang nila na sa mga bata nga huyang og immune system nga dali ra mataptan og balatian. Makig-ilog ang mga langaw sa pinuy-anan sa mga tawo, ang pagkaon nga bisan init pa tugpahan nila, dili ko ka imagine sa kalisang sa mga tawo.
24 oras kuno ang presensiya sa mga langaw kay bisan gabii gahadyong ug gatugpa ang mga langaw sa lawas ss mga tawo busa ang uban dili makatulog. Hinuon ang.kadtong adunay mosketiro pwede ra makapahulay.
Gamit kaayo ang mosketiro panahaon sa adlawan kay gamiton man nila kini panahon sa tingkaon kay kong walay mosket aw makahigop gyud sila og sinabawan nga mga langaw.
Kining problemaha naabot naman seguro sa baranggay ug mismo sa lokal nga kagamhanan sa City of Naga ug segurado nangita na kini og pamaagi nga masolusyonan ang suliran nga naghulga sa kinabuhi sa mga tawo.
Apan hangtud kanus-a man magpaabot ang mga tawo sa kasolbaran sa problema? Unta kong kinsa man ang tag iya sa poultry sila mismo mohimo og aksyon sa sitwasyon dili na maghuwat nga pasirad-an pa sa kagamhnanan. Apan kong dili gyud matabang mas maayo nga ipahunong kini.
Kong nahimo sa LGU sa lungsod sa Asturias kaniadto nga ipasira ang poultry nga nakamugna sa susamang problema walay rason nga dili kini mahimo sa City of Naga.
Dili na maghuway nga adunay mangasakit ayha solbaron ang problema sa katawhan aron dili sila mapaninglan simbako mahitabo ang gikahadlokan. Magpasko na, dili malipay ang mga tawo kong maki-celebrate nila ang mga langaw.