Patay ang usa ka tinunan sa universidad dihang milayat kini gikan sa ikatulong andana sa boarding house nga gipuy-an sa iyang kanhi hinigugma. Matud pa sa taho, bag-o lang nga nagbuwag ang mànag-uyab. Apan wala mahibawi unsa ang rason sa panagbuwag sa duha. Ang tinun-an sa kurso nga accountancy nagpakamatay tungod kay matud pa dili kini makadawat sa ilang panagbuwag sa uyab.
Matud pa sa imbestigasyon sa kapolisan nga sa kaadlawon miabot ang tinun-an sa boarding house sa lalaki nga nahimotang sa Sambag 1 dakbayan sa Sugbo nga hubog ug gusto kini nga mosulod sa kuwarto sa iyang hinigugma. Apan wala pasudla hinungdan nga nagduda nga dunay laing kuyog ang kanhi uyab maong nagmaoy kini ug mibahad nga magpakamatay.
Gikan sa ikaupat nga andana mikanaug kini sa ikatulong andana. Giapas kini sa lalaki apan miambak ang babaye, nakuptan pa unta kini sa lalaki apan milugnot gayod hinungdan nga nahulog ug namatay.
Ang subrang pagbati sa paghigugma makamatay mao nga kun ikaw mahigugma pagbilin og para sa imong kaugalingon, ayaw ihurot.
Sa lain g bahin, gibuk-an sa iyang ulo ang biktima sa krimen tungod kay gidudahan nga asset sa kapolisan. Giingon sa mga kaila sa biktima nga wala kini kaaway sa dapit.
Unsa man gibasihan sa mga kriminal sa ilang pagduda nga ang ilang gipatay asset sa kapolisan? Ang lihok ba niini o ang dagway? Kun ang dagway, unsa man diay dagway sa biktima, suspecious looking? Luoya pod sa tawo nga nakabaton og dagway nga sama sa kriminal o iligalista kun mao man galing ning kalakiha. Asa man ang mga human rights advocate? Ok lang mo ani nga krimin?
Samtang, naputol ug nahanaw ang ugma ug pangandoy sa Grade 3 pupil sa usa sa mga tunghaan sa dakbayan sa Lapu-lapu human kini nadasmagan s motorsiklo samtang nagpaingon sa tunghaan.
Kining maong mga kaso tinuyo, gituyo ug wala gituyo.