Ambot unsay nakakumbinser ni kanhi Presidente Rodrigo Duterte, human sa daghang mga higayon sa pagpalusot ug paglikay-likay, sa pag-atubang na gyod sa House Quad Committee:
Tungod ba sa paghagit sa mga kongresista sa iyang pagka-lalaki;
Tungod ba sa ilang pagpaningil sa iyang saad pagtubag sa tanan nilang pangutana;
Tungod ba sa ilang tanyag pagtampo og kuwarta para sa iyang plite sa ayroplano ug bayad sa hotel sa pagtambong sa public hearing; o
Kay nahinayak lang siya sa pagsaad sa pagtambong human kalit nga gidayon ang gikanselar unta nga public hearing?
* * *
Kay nitambong man sa public hearing, napugos si Duterte, bisan nag-alburuto sa masuk-anon nga pagsupak ang iyang gibati, sa pagpaminaw sa mga pasidaan ug mga pasangil nga dugay nang gitan-ogan:
Gipasidan-an siya sa dili pagpamalikas ug sa pagtahud sa komitiba sa iyang pagtubag sa mga pangutana sa mga kongresista;
Gisalida ang video nga hinimo sa QuadComm sa iyang mga diskurso ug media interviews nga nag-awhag og laktod nga pinatyanay mosukol o dili mosukol ang mga suspek;
Nakapahungaw sa ilang pagbangotan ang mga paryente sa mga biktima sa extrajudicial killings.
* * *
Naapektahan pag-ayo si Duterte sa pahibawo ni Police General Francisco Rommel Marbil, hepe sa Philippine National Police (PNP), nga napasagdan ang gatosan ka polis nga namatay, nasamdan, nataktak, nasuspenso ug napriso tungod sa drug war.
Maong andam ang iyang tubag: Mohatag siya og usa ka milyon ka pesos nga tabang sa mga polis. Karon pa siya magsugod og ayuda? Ug nakalimot ba si Duterte nga usa sa iyang rason pag-isnab sa QuadComm mao nga wala na siyay kuwarta?
* * *
Human nanghulga nga iyang patyon ang mga imbestigador sa International Criminal Court (ICC) kon mangahas sa pagsilbi og arrest warrant batok niya, giapura na niya ang kalibotanong korte sa pagsugod dayon sa imbestigasyon kay tingalig mamatay na siya nga dili pa kasilotan.
Ambot may makapahinumdom ba ni Duterte nga hagbay rang nakabuylo ang imbestigasyon sa ICC batok niya ug sa iyang mga sinugo. Ug posibleng mabalhog na siya sa prisohan sa The Hague karong tuiga. Hinaot nga, lahi sa iyang mga suod nga silang Apollo Quiboloy ug Harry Roque, dili siya motago ug mokakak.
* **