Wala man ming pamilya nakabisita sa miaging All Saints’ Day ug All Souls’ Day sa among mga minahal, kinsa atua ilubong sa Balamban cemetery, amo na lang gihimo ang pagduaw kanila sa miaging Domingo, Nobiyembre 10, 2024.
Didto mi moagi sa Trans Central Highway, diin daghang motorista ang magpaturagas lang sa pagpakusog, naglumbaanay ug mokalit lag subay sa lane nga dili ilaha matag karon ug unya.
Rason, nganong daghan ang madisgrasya niining dapita ug alaot intawon ang nagtinarong nga naangin sa ilang kadanghag.
Usab, nanaglaray ang mga balay-patigayon: gikan sa mga mountain resort ngadto na sa mga restawran nga maoy nakapagamay sa dalan kay may pipila ka kabahin niini nga giparkingan sa mga nanaglinyang sakyanan. Unta, mabadlong kini sa atong mga otoridad.
Pag-uli namo, mihapit mi sa Tops. Tayming, kay sa dakong hawanan, kalit lang mibutho si Kuh Ledesma, kinsa miduol sa nahimutangan sa babaye’g lalaking singers mikuha sa mikropono ug miingon: “May I share with you something?” Nagtuo ang Tops’ singers nga mokanta si Kuh. Ug mao poy gituohan namo. Hinungdan, daghang midugok.
Apan dili diay kanta ang i-share ni Kuh. Ang iya diay’ng kasinatian dihang nakaila na siya sa Ginoo: ang Diyos Amahan, Anak ug Espiritu Santo nga nakapabag-o sa iyang kinabuhi ug hingpit natagamtaman niya ang matuod nga espirituhanong kalipay.
Nindot ang intro sa gipamulong ni Kuh. Gani, nagtuo ko nga usa siya ka Romano Katoliko sanglit ang iyang gisangyaw nahisulod man sa mga pagtulon-an nga anaa sa Balaang Kasulatan. Pero dihang mipaila siya nga ang iyang tinuohan: Born Again Christian, unya misaway nga may mga relihiyon kunong mituis sa kamatuoran, pastilan, nag-iyahayg atras ang mga nanan-aw, uy!
Kini nagpasabot, nga ang gidugok sa mga tawo, dili ang wali ni Kuh. Kondili, ang pagsaksi-pamati unta sa gipasikat niyang mga kanta. Diin, nahimong dawo si Kuh niadtong tungora.
Nangutana si Kuh kon unsaon pagsulod sa langit? Kon ako pay iyang giduol, tubagon ko siya sa pag-ingon: “Ibaligya tanan mong katigayonan ug ang halin ihatag-ibahinbahin sa mga nanginahanglang kabos. Unya, sunda si Hesus, ang Iyang mga tunob ug ang Iyang pagpalansang sa krus aron lamang maluwas ang tanang katawhan. Ug maangkon mo ang kalipay’ng dayon.”