Usa sa paspas nga paagi aron makaabot dayon sa habagatang bahin sa Sugbu mao ang pag-agi sa Cebu South Coastal Road diha sa South Road Properties.
Lapad ang mga dalan mao nga dali ra pud makaabot sa padulngan. Padung sa south o padung sa north, dali nalang kaayo kun itandi sa pag-agi sa Natalio Bacalso Avenue.
Nakatabang og dako ang CSCR sa pagmenus sa traffic sa N. Bacalso, gawas nalang kun dunay mga okasyon sa Talisay City o ba kaha sa SRP sa Cebu City.
Apan ang CSCR usahay kuyaw kaayong agian kay dunay magpaturagas lang og padagan diha nga mura og nakatag-iya og karsada. Walay pagpakabana sa ubang motorista.
Daghan nang mga namatay sa CSCR tungod sa aksidente . Dili mahitabo ang aksidente kun ang tanang drayber responsable lang unta kun magmaneho ug dili abusado.
Busa maayo kaayo kining planong magumol og SRP Patrol Group nga motutok sa pagbantay sa trapiko.
Maayo unta og dili lang trapiko nga maghuot ilang bantayan kondili apil na kining mga kaskasero ug magsige og balhin-balhin og lanes mura og nakiglumba sa uban o gustong magpakita nga maayo silang momaneho.
Kay mao ni ang sagad hinungdan sa mga aksidente. Makaamong sa uban. Kung madayun na kining SRP Patrol, mopatuo unta ang mag drayber.