Maghigpit na sab ang Cebu City batok aning pagpakilimos sa kadalanan pinaagi sa estrikto na sab nga pagpatuman sa Anti-Mendicants Ordinance sa siyudad nga dugay ng napasar apan wala ra kaayo maimplimentar.
Sa press conference kagahapon kauban sa Anti-Mendicancy Board sa siyudad, gipahibalo sa grupo nga dunay daghang ipakatap nga mga enforcers nga motabang sa pagbadlong o pagdakop sa mga makililimos diha sa dalan. Apan kaning probisyon nga nag-ingong ang mga mohatag o motunol og limos pangdakpon ug tiketan , daghan gyud ang miisa ang kilay, sagolsagol ang reaksyon sa mga tawo bahin niini, dunay uyon duna say dili ug duna say wala ra magpakabana. Apan sa mga tighatagan gyud og limos tungod sa kaluoy o pagpakatawo, murag dili maayo paminawon. Nga sila pa nga motabang sila pa hinuoy himuong sad-an. Ngano man pud bitaw nga ang nitabang mao na mana hinuoy pakasad-on? Nganong dili nalang kaha pangusgan 24/7 sa siyudad ang paghipos anang mga makililimos sa dalan? Gani diha duol sa Basilica Minore del Sto. Niño, dunay daghang mga makililimos, apan tinuod nga ang kadaghanan nila mao kining mga libud-suroy nga walay klarong address o pinuy-anan.
Apan naa man gyuy mga tiguwang nga mamalimos diha sa aseras nga kun tan-awon wala na gyuy kapasikaran aron makapanarbaho aron mokita o makasweldo.
Samtang dili tuod maayo nga lawgan lang kining mga makililimos, apan dili tingali parehason tanang makililimos. Naay daghan diha mga dili para pagkaon ang limos nga ilang matigum kondili para sa bisyo.
Apan naa say tinud-anay nga para gyud pangpalit sa ilang pagkaon ug panginahanglan ang pipila ka sensilyong ilang matigum. Kanang mga magpalimos diha sa dalan nga magdala-dala og mga masuso o ba kaha kanang mga kabataang mokabyon sa mga pasaheroan aron manaygon, maoy angay nga badlungon ug hipuson kay gibutang nila sa peligro ilang kaugalingon ug ang mga motorista ug pasahero. Gawas sa mga makililimos, gikinahanglan na sab sa mga manaygon og permit karon sumala pa sa board. Kaning panaygon nahimo namang tradisyon kaniadto pa kun magpadulong na ang Pasko.
Ang paghatag sa mga nagkinahanglan gitudlo diha sa Bibliya, kun motabang, kinahanglang kinasingkasing gyud. Apan tingali tungod aning ordinansa, ipahimutang nalang ang pagtabang.