Liwas sa Kalag-kalag. Bugtong mga basura ug mga upos sa kandila ang nagpabilin. Diyotay na lang usab ang mga tawo nga nagtikaw tikaw.
Ang kanhiay kagahob nahulipan og kamingaw. Sa wala pa ko mobalik niini aron magmisa nahinumdom ko sa nilabay nga adlaw nga dunay bata nga premature nga naanak nga akong gibenditahan.
Nahinumdom nuon ko nga niadtong seminarista pa ko nakabendisyon ako og bata nga nitaliwan usab. Wala gyuy pilion ang kamatayon, tiguwang man o batan-on. Ang mga lubnganan maoy timaan sa kamatayon natong tanan.
Ang kalag kalag bisan pa man kun tinuig nga kasaulogan apan matag adlaw kini nga pahimangno nga dili diay maayo nga magpatuyang. Sanglit ang tanan dunay kinutoban.
Matag adlaw bililhon, matag panahon halandumon. Human sa akong pagduaw sa mga lubnganan aron paghalad og mga pag-ampo. Bisan pa man kun ang mga lubnganan sa kinabuhi atua sa halayo apan sa gihapon ako silang giampo.