Magpunsisok karon ang mga tawo diha sa mga sam-ang aron sa pagduaw sa ilang mga minahal sa kinabuhi nga nitaliwan na ngadto sa laing kalibutan. Ang uban, padung palang mamauli sa ilang tagsa-tagsa ka mga lugar ug nagdasok sila karon sa mga terminal ug pantalan aron makasakay.
Apan karong adlawa, Nobiyembre 1 ang pagtimaan sa adlaw sa mga Santos agi og paghatag og respeto sa ilang pagka-martir sa pagpanalipod sa tinuohang Kristiyano mao nga maayo sab tingaling molitok og mga pag-ampo para kanila.
Para sa mga tawong dili gyud makahigayon sa pagpauli, anha nalang gyud sa dakong krus aron pagdagkot og kandila para sa mga kalag sa ilang mga nitaliwang minahal sa kinabuhi ug molitok og pipila ka mga pag-ampo para nila.
Kani nga tradisyon naila nga iya sa mga Kristiyano. Gani didto sa Mexico usa kini ka dakong selebrasyon nga mura og festival, kining gitawag nila og Dia dela Muerte o adlaw sa mga patay diin ang tanan mag-costume gyud sama og minatay.
Apan dili ikalimod nga dili lang ang mga kristiyano ang nagtuo adunay kalag ang tawo, hasta pud ang laing mga tinuohan sama sa mga Buddhist, Islam, mga protestante ug uban pa. Nagpasabot lang kini nga kitang tanan naglantaw nga adunay kaluwasan sa kataposan bisan pa man og unsa ang atong kinabuhi ibabaw sa yuta.
Karong panahona maayong mamalandong sab ug balikan ang mga nindot nga mga kasinatian kauban ang mga minahal sa kinabuhi nga nitaliwan na .
Usa sab kini ka maayong paagi aron mapasa nato ang maong tradisyon sa atong mga kabataan aron sa ingon , nga kun kita na sab ang mamahuway sa dayon, duawon sab ta nila ug dili hikalimtan. Ang labing maayong pasahan ani nga tradisyon mao ang mga anak ug mga apo, kay ang ilang mosunod nga mga henerasyon sa kaliwatan malimot na kanato kay wala sila sukad makakita kanato.
Busa importante kaayo nga samtang buhi pa, mas maayong bugkuson ang maayong relasyon diha sa sud sa pamilya. Kay kining kalag-kalag, adlaw kini dili lang para sa mga minatay kondili adlaw sab sa reunion sa mga buhi ug sa mga namahuway na.