Bisan klarong pamolitika ang imbestigasyon sa House of Representatives giunsa paggasto ang iyang confidential funds (CF), angay’ng kasohan og plunder ug palagputon pinaagi sa impeachment si Bise Presidente Sara Duterte tungod sa pagwaldas sa buhis sa katawhan:
Klarong pamolitika kay ang gikutikuti mao rang CF ni Duterte nga kaatbang ni House Speaker Martin Romualdez, wala apila ang CF sa alyadong mga opisyal sa administrasyon; pero
Angay gihapong silotan si Duterte tungod sa nahipos nga mga ebidensiya sa pagpangawkaw ug sa pagpaugat niya sa pagdumili sa pagpasabot sa kuwestiyonableng mga gasto.
* * *
Sayop ang pag-insistir ni Duterte nga adto ra siya motubag sa Commission on Audit (COA), nga nisugo na niya sa pag-uli sa dakong bahin sa CF, ug sa mga korte, kon dunay mga kasong ipasaka.
Kay bisan kon mayoriya sa mga kongresista nga nangimbistigar niya kapasanginlan nga mga batabata ni Romualdez, dili ma-isnab ni Duterte nga apil sa gahom sa House paggahin og kuwarta ang gahom pagsubli giunsa paggasto ang aprubadong budget para sa Office of the Vice President (OVP) Department of Education (DepEd) sa siya pay education secretary.
* * *
Kapasanginlan unta nga lunlon pamolitika ang gihimo sa mga kongresista kon wala pa makakuha og mga dokumento nga gibolsa ang CF:
P53 milyones nga abang sa safehouses (P16 milyones sa 11 lang ka adlaw sa 2022; P16 milyones unang quarter sa 2023; P16 milyones sa ikaduhang quarter sa 2023; ug P5 milyones sa ikatulong quarter sa 2023); ug
P15 milyones sa Youth leadership summits (YLS) nga wala gastoha kay wala diay labot ang DepEd sa kalihokan.
* * *
Kon tarung ang House Committee on Good Government, kon dili tinuod nga mga itoy silang Romualdez, angay nilang lilion giunsa paggasto ang CF sa ubang mga ahensiya.
Sama pananglit sa Office of the President (OP). Nga mas dako og CF. Kahibawo na ta giunsa pagwaldas ang P500 milyones nga CF sa OVP ug P150 milyones nga CF sa DepEd sa 2023 (wala na gahini sa 2024 ug sa sunod tuig 2025). Pero walay nagtagad pagpahibawo nato giunsa paggasto sa OP ang P2.25 bilyones niyang CF sa 2023. Nga gikopya ra para sa 2024 ug 2025.
* * *