Dugay nang gipangandoy sa milyonmilyong boxing fans nga magkasangka na sila si 4 Division World Boxing champ, ang monster sa Japan nga si Inoue Naoya, nga adunay 28-0 win-loss record (25 KOs), ug si kanhi 3 Division World Boxing champ Johnriel ‘Cuadro Alas’ Casimero sa Pilipinas nga duna poy 34-4-1 win-loss-draw record (23 KOs).
Sa miaging Casimero-Saul Sanchez super bantamweight bout didto sa Yokohama, Japan, Oktubre 13, 2024, mitambong si Inoue ug atubangan sa ringside nakita niya kon giunsa ni Cuadro Alas pagpusoy ang lig-ong Saul sulod lamang sa usa ka rawon.
Ang unang pagkagrogi ni Saul human maigo sa solidong suntok, diin giiphan kini sa referee, dayon ang pagkanakdawon tapos masabak ang nawong sa daw puthawng left hook, unya nakabangon man tuod, naiphan pag-usab ug nakaharong pa pagbalik.
Apan gihunong sa referee ang payit dungan ang paggakos-warawara sa mga kamot timaan sa pagdeklarar og standing knockout human himatikdi nga dili na mabangbang ang mga panapos suntok ni Casimero batok sa kalup-ogon nang Saul?
Kining tanan nasaksihan ni Inoue, kinsa dihang daklit natutokan sa kamera iyang presensiya, miluta sa iyang panagway ang hagbay ra niyang gitipigan nga kabalisa-kabalaka-kahadlok.
Sanglit nakalapas man si Alas sa usa sa mga lagda sa Japan Boxing Commission nga mao ang pagka-overweight niinig 1.23 lbs. sa maong payit, gisilotan siyag usa ka tuig nga dili makaaway sa Japan.
Ug kini sab ang gihimong rason sa Team Inoue kang kansang manedyer mipahayag, nga gitangtang na si Alas sa ilang listahan sa mga boksidor nga gusto nilang i-match ni Inoue.
Misamot kabanha ang mga kritiko, kinsa nagtuo nga laing alibi na pod kini sa sa Team Inoue aron malikayan nila si Casimero. Pero ang tinuoray, nahadlok sila nga pildehon ang ilang Monster sa Alas sa Pilipinas. Hinungdan, pabilin silang nagmaidlas sa “Let’s fight!” nga hagit-panawagan ni Cuadro Alas!
Ug, ambot, may katumanan pa ba kaha kini? Ang nakabati lang kay si Inoue, sa ESPN top 3 sa pound for pound king.
Unya, manalaw? Pastilan, layo ra siyang Pacman, kinsa mas dagko-mas taas sama ni Floyd Mayweather Jr. maoy ampay. Pero kinsay sigeg dagan-lihaylihay? Si Floyd pa!
Unta, si Pacman maoy sundogon ni Inoue. Ug dili si Floyd.