Sa pagbanhaw na usab sa isyu sa extrajudicial killing kon EJK nautingkay na usab ang mga personalidad nga nalambigit sa kanhi administrasyong Duterte diin wala usab magpaulahi dinhi sa dakbayan sa Sugbo.
Gani mora'g sa syudad ang nagsilbeng pang buena mano sa EJK kay 22 pa lang ka adlaw human milingkod si Duterte niadtong tuig 2016 aduna namay natumba nga 22-anyos nga nga lalaki kinsa gilambigit sa illegal nga drugs.
Gikan naligo ang biktima dihang gisulod sa duha ka pulis ang ilang balay ug gikuha siya dayon gidala sa gawas ug didto gipusil patay kay lagi nisukol kuno sa mga otoridad ug nakuhaan pa kuno og shabu ug armas de fuego ang biktima. Ang apohan sa biktima nagpatabang sa Commission on Human Rights kinsa miaksyon usab dayon.
Nataral gyud nila sa Ombudsman ang usa sa duha ka pulis ug niabot gani sa korte kinsa gipasakaan og kasong homicide nga unang gikadismaya sa pamilya ug CHR kay tataw kuno nga murder ang nahitabo apan alang sa mga otoridad self-defense ang ilang gihimo kay nanlaban man lagi ang biktima.
Giadto nako ang pamilya sa namatay kagahapong adlaw, walo ka tuig na ang nakalabay ug nasayran nako nga na-settle ra diay ang kaso human nakahukom ang inahan ug apohan nga dawaton ang tanyag sa pulis kinsa nangayo usab og pasaylo kanila dungan sa pagtanyag og kantidad.
Matud sa pamilya nga pulos na sila tiguwang ug masakiton wala usab silay ikasugakod sa galastohan sa pagpadagan sa kaso kay naglisod man gani sila og asa manguha ipalit sa ilang panginahanglan. Hinungdan nga gidawat nila ang offer ug nagkapinasayloay na sila.
Gustohon man nila nga ilaban gyud ang kaso apan sa ilang sitwasyon dili pud nato makwestyon ang ilang desisyon.
Gipasaylo man nila ang suspek ug wala na sila mopadayon sa kaso wala kuno kini magpasabot nga gikalimtan nila ang nahitabo diin magpabilin kini matud pa sa ilang kasing kasing nga nasamad ug hangtud sa hangtud magdugo nga daw walay kaayohan.
Usa ka milyon ka pesos ang settlement money nga gidawat nila nga magamit nila sa ilang inadlaw-adlaw nga panginahanglan. Apan wala magpasabot nga gibaligya na nila ang ilang tinguha nga pag-angkon sa hustisya. Mas gipili sa pamilya nga makaangkon og kalinaw sa ilang hunahuna.
Daghan ang mga kaso nga nakatan-og lang karon sa buhatan sa CHR apan nagpaabot lang sila sa mga tagtungod nga mopatim-aw sa ilang buhatan ilabi na karon nga gitutokan sa kagamhanan ang nahitabo kaniadto. Busa giawhag nila kadtong mga pamilya sa mga nabiktima nga makig-alayon kanila.
Dili hinuon nila mapugos ang mga tagtungod nga padayong magpakahilom kay aduna silay tagsatagsa ka rason nga sila ra usab ang nasayod. Ma anaa man o walay reklamante magpadayon gihapon ang CHR sa mandato nila nga pagpakigbisog alang sa katungod sa mga tawo nga mapanalipdan.