Mao kini ang sitwasyon sa mga tawo nga anaa sa patag sama nalang sa nahitabo sa Purok Tambis Barangay Paknaan sa dakbayan sa Mandaue nga gilunopan sa baha ang ilang dapit kinsa nakuratan niadtong nakalabay'ng Sabado kay wala man untay ulan niadtong higayonan apan kalit ra man nibusagak ang baha nga misulod sa ilang dapit.
Gikan diay sa bukid ang tubig nga misubay sa Butuanon River ug nakaabot sa patag diin ang naasoy'ng dapit sa Barangay Umapad ang gipuntarya sa tubig nga lapas tawo ang giladmon. Busa gikinahanglan pa silang rescue-hon aron maluwas kay kusog man usab ang sulod sa tubig. Ang mga butang nila nangadanyos gyud intawon, ilabi na kadtong mga balay nga walay taas. Bentaha kadtong dunay second floor kay naluwas pa ang ilang ubang mga butang, hinuon bahala na ang mga butang nga madaut basta luwas lang ang kinabuhi sa mga tawo mao kana ang mahinungdanon.
Mokapin sa 300 ka pamilya ang naapektohan base sa listahan sa City Social Welfare Service sa Mandaue City kinsa gipahiluna sa Umapad Elementary School ug gipanghatagan sila og mga pagkaon ug buang gikinahanglan sa city government.
Ang dapit nga gibahaan mora'g nahimutang sa suok kaayo nga moagi pa sa pribadong luna nga dunay gate. Gani kadto pa ko nakasulod niadtong dapita kay kong tan-awon sa highway mora'g walay komunidad nga ni exist apan daghan man diay ang nanimuyo sa dapit nga nagkinahanglan og pagtagad sa ilang problema.
Usa sa nakit-an nga problema ug solusyon sa susamang higayon ang koral sa dapit nga nag-uwang sa usa ka pribadong luna nga nabuhang ug maoy agianan sa tubig panahon nga adunay uwan. Unta kong mapalig-on sa lokal nga kagamhanan ang koral murag dili man seguro magrabehan ang ilang sitwasyon.
Apil sa nakaingon nga nababoy ang ilang kahimtang ang pagtak-op sa usa ka pribadong tag-iya sa yuta ang agianan or drainage sa tubig hinungdan nga wala na kiniy kalutsan. Hilabihan ka peligro ang ilang sitwasyon nga kong dili madali sa pagsulbad simbako lang duna gyuy kinabuhi nga makalas intawon.
Tuig 2022 pa man diay kini nigrabe nga problema tungod usab sa development sa dapit ug samtang nagkadugay nagkapeligro ang ilang kahimtang sa mga katalagman. Gani dili lang baha kon dili apil sa sunog wala silay kapilian. Unta matagad na usab kini sila sa mga anaa sa kagamhanan. Hinoon basin tagdon na kay eleksyon naman mahinumduman ra man sila basta panahon sa piniliay.
Dili lang unta bandaid nga solusyon kon dili kongkretong aksyon ug malungtaron nga kasolbaran sa suliran ang ilang himoon aron seguradong walay makalas aron dili na lobat lobatan pa ang mga tawo kinsa manguros na daan bisan wala pa ang uwan.