Wala magpaiwit si House Speaker Martin Romualdez. Sa unang adlaw pa lang, Oktubre 1, 2024 nga filing of Certificate of Candidacy (COC), mipayil gilayon siya sa Commission on Election’s office, Leyte. Apan inay pagka-senador iyang lansaran aron masukod kon siya gimahal na ba sa katawhan ug maoy botaran sa kinabag-an, mas gipili niya ang kandidatura pagka-kongresista sa 1st district sa Leyte. Diin, didto niya gipayil sa Tacloban City, iyahang hometown, kang kansang libolibong namuyo gipasagdan lang niya dihang mihugpa ang grabe kabangis nga bagyong Yolanda ug mikalas og daghang kinabuhi.
Gusto man kahang mag-presidente si Martin ini'g ka 2028? Dapat iyang gitestingan ang tubig, kon ini'g tugsaw sa iyang tudlo, mobawod ba ang kinatibuk-ang lim-aw timaan nga nabati niini ang iyang kainit. Dapat, Senador iyang daganan kay tibuok nasud maoy mobotar, komparar sa pagka-kongresista nga usa ka distrito lang. Adunay miingon nga nanalaw kuno si Martin. Hadlok modagan pagka-senador kay seguradong mapilde. Tingale, nakita nila ang reaksiyon sa katawhan matag higayon nga si Martin, mag-ala-Willie Revillame ibabaw sa entablado, magsiyagitsiyagit-moanunsiyo unsa ug pila ang ayudang iyang ihatag ngadto sa mga nanambong nga daw gipakasama niyang makililimos.
Nalimot siya nga kining gipanghambog niyang ayuda, dili gikan sa iyang bulsa. Kondili, gikan ra usab niining mga kabos nga tungod sa pagkakorap niining administrasiyong Marcos, intawon maoy nag-antos. Hinungdan, nga kada Ayuda Showtime ni Martin sa mga dapit nga iyang adtoan, siya ug iyang mga alipores ra gyoy nahimuot. Kay ang mga nanambong, nagmug-ot!
Maong nagpa-reelect na lang siya didto sa Leyte, iyang balwarte. Kay kon midaog man siya pagka-kongresista niadtong 2007-2016, diin wala pa makabalik ang mga Marcos sa Malakanyang, samot na karon nga si Bongbong Marcos nay presidente? Unya si Martin maoy House speaker sa Kongreso, kinsa gamhanan kaayo kon kuwarta nay hisgotan? Mas relaks si Martin kon molansar pagka-kongresista. Kay segurado siyang maoy modaog. Lisod kon mag-senador. Basin, mapilde pa! Mawagtang ang iyang pagkahari sa Ubos Balay Balauranan?
Ingon niini ka segurista si Martin. Pero angay hinumdoman. Ang politika usa ka sugal. Bisa'g unsa kanindot sa regla nga maoy nakahatag nimog sunodsunod nga daog, aduna g'yuy higayon nga kini masilat. Sanglit, ‘sometimes the runner stumbles!’