Nakalayas nga mga opisyal ug mga trabahante sa ilegal nga Philippine Offshore Gaming Operations (POGO) sa Porac, Pampanga (kay gipindotan sila usa ka adlaw sa wala pang ronda niadtong Hunyo 4 ning tuiga) unang gidala sa Cebu City, dayon sa Mandaue City, sa wala pa mosangko sa Lapu-Lapu City (diin sila naronda ug nadakpan niadtong Agosto 31).
Mao nga dili si Mayor Ahong Chan ray angay’ng mahasol. Nalutsan sab sa ilegal nga kalihokan ang mga nataran nilang Acting Cebu City Mayor Raymond Garcia ug suspended Mandaue City Mayor Jonas Cortes.
* * *
Niadtong Hunyo 8, lima ra ka adlaw human nabulabog ang ilang 10 ka ektarya nga POGO hub sa Porac, nakapadayon dayon ang ilegal operasyon sa sindikato sa LMSK building sa Paulo Almendras St. sa Barangay Mabolo sa Cebu City.
Gibanabanang 200 ka langyaw nga trabahante ang gipugos sa paghimo og scamming activities batok sa mga molupyo sa mga nasud nga ilang gigikanan. Pagka Hunyo 24, gibalhin sila sa upat ka andana nga building sa No.23 sa Mango Green Subdivision sa A.S. Fortuna St. sa Mandaue City.
* * *
Niadtong Hulyo 24, dihang nakaikyas ang duha ka Indonesian nationals ug nakadangop sa Mandaue City Police Station 4, gikatag ang mga trabahante sa: St. Martin Village sa A.S. Fortuna St. sa Mandaue City; building duol sa Robinsons Galleria sa Cebu City; ug apartment duol sa Pacha De’ Mactan.
Sa gabii sa Hulyo 24, nahibaw-an sa mga ahente sa National Bureau of Investigation (NBI) sa lalaking caretaker sa condominium building sa St. Martin Village nga ang operasyon gibalhin sa Tourist Garden Hotel sa Agus sa Lapu-Lapu City.
* * *
Human naaktohi ang 169 ka langyaw ronda ug nakasohan og human trafficking ang 16 ka gidudahang recruiters, gipa-imbestigar ni Secretary Benhur Abalos sa Department of Interior and Local Government (DILG) duna bay koneksiyon sa POGO ang Sugbuanong mga opisyal.
Hinaot na-imbestigar nang mga tag-iya sa buildings sa Cebu City, Mandaue City ug Lapu-Lapu City nga gigamit sa POGO. Nalipat ba lang o kakonsabo? Hinaot dili magpangikog si Mayor Garcia pagsusi nganong wala mabadlong ang dul-an sa buwan nga POGO operations sa LMSK building. Kansang tag-iya pareha niya og apelyido–Lucy Franco-Garcia.
* * *