(Ikaupat nga Bahin)
Naglangkob kini sa mga pag-ampo nga gituboy ngadto sa Dios o pinaagi sa pangama sa mga santos, mga angheles ug arkangheles aron malingkawas ang tawo, dapit, butang, ug hayopan gikan sa pagsamok sa mga dautang espiritu nga wala na magkinahanglan sa paggamit sa pormal nga ritwal. Ang si bisan kinsang matuohon (Katolikong Binunyagan) nga dunay hustong tumong, ug gawi.
Pahimangno
Niadtong Septiyembre 29, 1985 ang Congregation of the Doctrine of the Faith ang nipahimangno pinaagi sa sulat ngadto sa mga kaobispohan sa tibuok kalibutan nga dunay mga pundok kun panagtigom nga nag-ampo alang sa kalingkawasan gikan sa gahom sa dautang mga espiritu nga pagadumalahon sa mga layko bisan pa man kun anaa nitambong ang mga kaparian sa maong panagtigom. Gibaoran sila nga walay katungod ug faculty sa paghimo og mga pag-ampo, pagpangutana sa demonyo kalabot sa iyang kaugalingon ug kalihukan. Kining maong matang sa panagtigom ug pamaagi ang hugtanong gidili.
c.Pag-ampo alang sa kaayohan
Matang sa pag-ampo ug pangamuyo ngadto sa Dios aron mabatonan ni bisan kinsa ang kaayohan alang sa iyang espirituhanon, lawasnon, pagbati kun emosyon, ug hunahuna. Kasagaran daghan ang nagpaampo sa kaayohan gikan sa lawasnong balatian. Adunay malangkubong pagpasabot ug pahimangno ang Congregation of the Doctrine of the Faith nga gipatik niadtong Septiyembre 14, 2000 kalabut ning maong hilisgutan.
6. Kuyaw! Pagmatangon sa mga peke nga pari ug eksorsista
Sa pagsaka sa kaso sa mga dili kasarangang mga lihok sa demonyo nagpasad na usab ang mga dili tinuod nga mga pari ug eksorsista aron kunohay pagtabang sa mga biktima. Ang ilang pangalagad pagaisipon natong makuyaw kun delikado. Ang tinuod nga mga pari ug eksorsista ang balidong naordinahan sa ilang mga obispo ug balido usab nga nahatagan og mandato pinaagi sa appointment letter, pinasikad sa balaod sa Simbahan kun Canon Law.
Gitataw usab nga ang matag mandato dunay limitasyon ug teritoryo. Sa ato pa, ang usa ka paring eksorsista dili makabansay sa maong pangalagad ngadto sa laing dyosesis sanglit ang iyang teritoryo anaa man sa iyang artsidyosesis o dyosesis.
Aron mas tataw: ANG TAGA MAASIN DILI MAKAPANGHINGILIN OG YAWA DINHI SA SUGBO UG ANG TAGA SUGBO DILI MAKAHINGILIN OG YAWA DIDTO SA MAASIN. Gawas lamang gumikan sa sitwasyon ang obispo sa nahisgotang mga dyosesis ang mohatag sa iyang dayag nga pagtugot sa pari nga gihangyo aron motabang sa panon nga sakop sa iyang dyosesis. Kun wala ang DAYAG NGA PAGTUGOT ang pari dili makahimo sa eksorsismo sa dapit nga dili sakop sa iyang teritoryo segun sa mandato gikan sa lokal nga ordinaryo.
Ang PEKE/MINI NGA PARI UG PEKE/MINI NGA EKSORSISTA ang walay espirituhanong gahom ngadto ni bisan kinsa nga niduol alang sa iyang serbisyo. Usa kini ka dakong panlimbong, kasagaran gumikan sa kwarta, daghang mga mini nga mga pari ang nagpaaron nga sila mga eksorsista. Dili balido ang ilang ordinasyon nga moresulta usab og dili balido nga mga kasaulogan sa mga sakramento ug bendisyon.