Angayang susihon unsa ka tinuod ang kasayuran nga dunay mga opisyal sa City Hall nga nagpahimulos sa ilang pwesto aron tentalon ang mga job order workers nga makig-uban nila sa kinawat-kawat nga kalipay ibabaw sa katre.
Tungod kay ang maong mga opisyal naghupot og puder o ba kaha impluwensiya, mapugos ang ubang mga JO pagsunod sa ilang gusto sa kahadlok nga mawad-an intawn sa ilang trabaho. Labi pa intawn kadtong mga nagkinahanglan kaayo sa ilang trabaho alang sa pamilya, mopiyong nalang ug buhatan ang tanan bisan kontra sa kabubut-on aron kaprotehian ang ilang trabaho.
Ang akong mga kasaligan nga tinubdan diha sa City Hall mitug-an nga ang paagi kuno sa maong mga mapahimuslanon nga mga opisyal diha sa City Hall mao nga sekreto nilang hung-on ang ilang magustohan ug hayloon sa kwarta nga ipada pinaagi sa remittance center sama sa Palawan.
Tungod ini napagya diha sa City Hall ang “Palawan Boys” o ang grupo sa mga opisyal nga kasagaran mga tiguwang nga mamiktima og mga JO. Samtang personal ni nilang kinabuhi ug way labot ang publiko niini, apan dili husto sa usa ka opisyal o kawani sa gobiyerno ang pagbuhat sa ingon. Labi pa og imong pahimuslan ang puder nga imong gihuptan aron pugson ang usa ka yanong kawani nga mosugot sa yawan-on nga binuhatan.
Way luna sa desente nga panggobiyerno ang mga opisyal nga duna niining maong kinaiya. Labi pa og minyo o duna nay pamilya ang mga hingtungdan.
* * *
Unsa ka tinuod nga dunay kawani sa City Hall nga gibugno sa asawa ug anak sa usa ka opisyal tungod kay gidudahang kabit? Giingon nga nahitabo ang insidente niadtong miaging Lunes sa Satellite Office sa City Hall.
Sigun sa mga kasayuran nga atong nahipos, nahibaw-an sa asawa nga nagbinoang ang iyang bana human hapit wa nay mahabilin sa sweldo niini kay inay adto sa asawa iintrigo ang iyang kita, tua na hinuon kini igasto sa iyang batan-on nga karelasyon.