Dear Atty. Divine,
Ang akong igsuon namatay ug karon ang iyang haya naa sa balay nga iyang gipuy-an uban sa iyang live-in partner. Ang akong igsuon adunay legal nga asawa ug adunay mga anak. Karon gusto sa mga anak nga kuhaon ang patay’ng lawas sa ilang amahan ug sila ang magbuot kun asa kini hayaon ug asa ilubong. Apan ang kapuyo wa mosugot kay mao kunoy tugon sa namatay nga anha siya sa ilang gipuy-an magpahaya ug siya sab daw ang gitahasan nga mo-decide kun asa kini ilubong. Ang akong pangutana kun aduna bay katungod ang kapuyo nga mopugong sa kagustuhan sa mga anak sa namatay? Daghang salamat. —Gretchen
Dear Gretchen,
Basi sa atong balaod, ang funeral sa namatay dapat ibasi kun unsay iyang gusto sa dihang siya buhi pa or basi sa iyang religious belief. Apan sa kaso sa imong igsuon, wa sab ta masayud kun tinuod ba nga maoy iyang tugon nga anha siya hayaon sa iyang gipuy-an uban sa iyang kapuyo. Samtang ang mga tawo sab nga maka-decide sa funeral arrangement mao kadtong naa sa order for support nga nalatid sa atong Family Code nga naglakip sa asawa or bana, mga anak, mga ginikanan or mga igsuon. Busa sa kaso sa imong igsuon, naa man siya’y legal nga asawa ug mga anak, sila ang adunay katungod nga modesisyon niini ug dili ang kapuyo. Mamahimong kuhaon sa mga anak ang patay’ng lawas sa ilang amahan ug sila ang modesisyon sa funeral arrangement niini. Way mahimo ang kapuyo kun buhaton kini sa legal nga pamilya sa namatay. Apan aron di magkagubot mas maayo nga buhaton kini sa mga anak sa malinawon nga paagi, pinaagi sa pagpasabot sa kapuyo sa ilang amahan as a sign of respect sab sa ilang amahan nga mitaliwan na. Thank you and God bless. Atty. Divine
Alang sa inyong pangutana, palihug lang sa pag email sa flores_divina@yahoo.com ug akong tubagon ang inyong pangutana pinaagi sa akong column matag Miyerkules, Sabado ug Domingo.