Unang bahin
Pari: Gisalikway mo ba si Satanas, Amahan sa Sala ug Prinsipe sa Kangitngitan? (Balikon sa makatulo)
Pasyente: Nagasalikway Ako
Pari: Ug sa tanan niyang mga buhat?
Pasyente: Nagasalikway ako.
Pari: Ug sa tanan niyang mga saad?
Pasyente: Nagasalikway Ako
Pari: Nagasalikway ka ba sa mga balansayon ug Espiritu sa tagna tagna, ug sa mga occult nga kalihukan? Aron mabatonan mo ang kagawasan ingon nga mga anak sa Dios? (Balikon sa makatulo)
Pasyente: Nagasalikway ako
Pari: Gisalikway ba nimo ang tanang matang sa kadautan ingon man ang pagpaulipon sa Sala?
Pasyente: Nagasalikway Ako.
Pari: Karon isugid ang imong mga sala atubangan sa Dios uban ang matinud-anong paghinulsol.
Pasyente: Nagakumpisal ako nganha kanimo O Dios Magbubuhat ko nga akong gisimba ug gihimaya O Santisima Trinidad sa ngalan sa Amahan (Manguros) ug sa Anak, ug sa Espiritu Santo. Ang tanan kong mga sala nga akong nahimo sa tanang adlaw sa akong kinabuhi, sa matag takna ug higayon, ang mga sala nga akong nahimo sa nilabay nga panahon adlaw ug gabii. Diha sa akong hunahuna, sa akong mapasagarong pagkinabuhi ug sa mga sala gumikan sa pagkawalay pagpugong sa akong mga sentido, sa mga higayon nga ako nakasala sa kasuko, kasina, kalaog, kahakog, kaulag, garbo ug kataspok.
Sa mga higayon nga dili ako makiangayon sa akong mga silingan ug isigkatawo. Sa mga higayon akong nisulay og nitahan sa paggamit sa mga gahum gumikan sa occult kuyog niini, ang pagdumot, kasilag, ug sa mga higayon nga ako nipahilayo kanimo. Sayud ako nga nasuko ka Kanako O Dios. Uban ang dakong pagpaubos ako nangaliyupo nga unta ako imong kaloy-an ug pasayloon sa tanan nakong mga sala. Nagabakho ang akong tanlag kuyog niini ang gihambin nga kaulaw gumikan sa akong mga sala. Nagkinahanglan ako sa imong kalooy ania sa imong atubangan akong gihalad ang tanan nga ania Kanako. Gikinahanglan ko dako uyamot ang imong kalooy sama nga imo kining gihatag ngadto sa tanang katawhan. Amen.
O Dios (manguros) pasayloa ang tanang mga sala nga akong nahimo tinuyo ug wala tuyoa, ang mga sala nga nasayran ug wala masayri nga nahimo ko sa imong atubangan sa adlaw ug gabii ug padayong naghasol Kanako. Pasayloa ako gumikan sa imong kaayo ug gugma sa tanang katawhan. Amen.
Pukpokon ang dughan sa makatulo
O Dios malooy ka Kanako nga usa ka makasasala. (3x)
Kaloy-I ako O Dios, Sa akong pagkamasalaypon dili ako makapanalipod sa akong kaugalingon. Kanimo akong gihalad kining mga pag-ampo. Kaloy-I ako.
Himaya sa Amahan ug sa Anak ug sa Espiritu Santo.
Ginoo kaloy-I ako sanglit nagasalig man ako kanimo. Sa imong kasuko ayaw hinumdomi ang akong mga kalapasan apan diha sa kahiladman sa imong kalooy sud-ongon moa ko ug luwason mo gikan sa akong mga kaaway, makita ug dili makita. Kay ikaw man ang akong Dios ug ako ang imong ulipon, ako ang gimugna sa imong kamot. Sa kanunay nagasangpit ako kanimo! karon ug hangtud sa kahangturan.
Padayonon sunod gula
O Balaang Inahan sa Dios, ihatag diha sa ganghaan sa imong halawom nga kalooy ngari Kanako nga dili unta ako madala sa kalibog, apan pinaagi kanimo makalingkawas unta ako gikan sa mga pagsulay; kay ikaw man ang kaluwasan sa Kristohanong panon.
Ginoo malooy ka! (Balikon makatulo)
Pari: kaloy-an unta ikaw (kamo) sa Dios, pasayloon sa imong mga sala ug dad-on ikaw (kamo) Niya ngadto sa Kinabuhing Dayon.
Tubag: Amen.
Pagaampoon kini sa pasyente o biktima
NGADTO SA ANGHEL NGA MAGBALANTAY
Anghel ni Kristo, balaang magbalantay ug manalipod sa akong lawas ug kalag. Pasayloa ako sa akong mga sala karong adlawa. Luwasa ako gikan sa akong mga kaaway , nga dili unta mapungot ang Dios Kanako gumikan sa akong pagkamasalaypon, ako nga dili takus nga sulugoon Niya. Unta imo akong iatubang kun maangayan man gumikan sa imong kaayo ug kalooy, ngadto sa Santisima Trinidad, ngadto sa Balaang Inahan sa ni Kristo Jesus nga si Maria Santisima ug ngadto sa tanang mga santos. Amen.
NGADTO SA MGA SANTOS NGA PATRON
Iampo moa ko O Labing Putli nga Inahan sa Dios, Maria Santisima, San Jose, San Rafael, Miguel, Gabriel ug sa tanang mga Santos ilabina ni San (Mahimong nganlan sa pasyente ang iyang santos nga patron) uban ang tumang kadasig ako nagadangop kaninyo aron inyong tabangan ingon nga tigpangama sa alang sa akong kalag.
Pari: Karon ibungat ang imo (inyong) pagtuo:
Nagatuo kami sa usa ka Dios, ang Amahan ug Makagagahum sa tanan Magbubuhat sa langit ug yuta /Ug sa tanang mga Makita ug dili Makita.
Nagatuo kami sa usa ka Ginoo, Si Jesukristo ang bugtong Anak sa Dios Gianak sa Amahan sa Amahan sa wala pa ang katuigan, Dios gikan sa Dios, kahayag gikan sa Kahayag
Matuod nga Dios gikan sa Dios nga matuod
Gianak dili binuhat, usa’g kinaiya sa Amahan.
Pinaagi kaniya nangahimo ang tanan.
Tungod kanatong mga tawo ug alang sa atong kaluwasan
Mikanaog siya gikan sa langit
(Iduko ang lawas ning dapita)
Sa Lalang sa Espiritu Santo
Nahimo siya nga may lawas Gikan ni Maria nga Ulay
Ug nahimong tawo. Tungod kanato gilansang siya sa krus sa sugo ni Poncio Pilato; nag-antos siya namatay ug gilubong. Sa ikatulong adlaw nabanhaw siya aron matuman ang kasulatan.
Misaka siya sa langit
Ug naglingkod sa tuo sa Amahan. Mobalik siya nga mahimayaon aron paghukom sa mga buhi ug mga minatay ug ang iyang gingharian walay katapusan.
Nagatuo kami sa Espiritu ang Ginoo ug ang maghahatag sa kinabuhi Nagagikan siya sa Amahan ug sa Anak/Dungan sa Amahan ug sa Anak Gisimba siya ug gihimaya
Ug misulti pinaagi sa mga propeta.
Nagatuo kami sa usa santos ug Katoliko ug Apostoliko nga Simbahan.
Nagaila kami sa usa ka Bunyag Alang sa kapasayloan sa mga Sala. Nagapaabot kami sa pagkabanhaw sa mga minatay, ug sa kinabuhi sa umaabot nga kalibutan. Amen.
Pari: Mao kini ang pagtuo sa Simbahan mapasigarbuhon kita sa pagpadayag niini diha kang Jesu-Kristo atong Ginoo sanglit kini man ang pagtuo nga moayo ug moluwas kanato!
Tanan: Amen! Amen! Amen!